រដ្ឋមន្ត្រីការបរទេសស្តីទីអ៊ីរ៉ង់លោក Ali Bagheri Kani បានប្រាប់សារព័ត៌មាន Newsweek ថា ការឈ្លានពានដ៏មានសក្តានុពលរបស់អ៊ីស្រាអែលលើលីបង់ នឹងក្លាយទៅជា «ឋាននរកដែលមិនអាចត្រឡប់មកវិញ សម្រាប់រដ្ឋជ្វីហ្វ។

លោក បាននិយាយដោយឆ្លើយតបទៅនឹងសំណួរអំពីជម្លោះដែលអាចកើនឡើង ថា៖«ក្នុងរយៈពេល ៩ខែកន្លងទៅនេះ ក្រុមជនជាតិជ្វីហ្វ បានបរាជ័យក្នុងការប្រយុទ្ធគ្នានៅតំបន់ហ្កាហ្សា។ ប្រសិនបើពួកគេ ចង់ចូលទៅក្នុងប្រទេសលីបង់ នោះវានឹងក្លាយជាអណ្តូងដ៏ជ្រៅសម្រាប់ពួកគេ។ លីបង់នឹងក្លាយជាឋាននរក ដែលមិនអាចត្រឡប់វិញបាន សម្រាប់ជនជាតិជ្វីហ្វ»។  

តាមគំនិតរបស់លោក តុល្យភាពនៃកងកម្លាំងនៅក្នុងតំបន់ បានផ្លាស់ប្តូរ បន្ទាប់ពីក្រុមហាម៉ាស បានវាយប្រហារអ៊ីស្រាអែល ហើយអ៊ីស្រាអែល បានចាប់ផ្តើមប្រតិបត្តិការរបស់ខ្លួន នៅក្នុងតំបន់ហ្កាហ្សាស្ទ្រីប។ យោងតាមអ្នកការទូតអ៊ីរ៉ង់ ជនជាតិអ៊ីស្រាអែល «អាចចូលប្រទេសលីបង់ដោយចេតនា និងស្ម័គ្រចិត្ដ និងពង្រីកសង្រ្គាមទៅកាន់លីបង់ ប៉ុន្តែពួកគេ មិនអាចបញ្ចប់សង្រ្គាម ឬភាពតានតឹងរបស់ពួកគេបានឡើយ»។

នៅពាក់កណ្តាលខែមិថុនា កងកម្លាំងការពារអ៊ីស្រាអែល បានអនុម័តផែនការសម្រាប់ការវាយលុក នៅក្នុងប្រទេសលីបង់។ បន្ទាប់ពីប្រតិបត្តិការរបស់ខ្លួនប្រឆាំងនឹងចលនាបដិវត្តន៍ប៉ាឡេស្ទីនហាម៉ាស នៅតំបន់ហ្កាហ្សាស្ទ្រីប អ៊ីស្រាអែលក៏ គ្រោងនឹងវាយប្រហារទៅលើក្រុមហេសបូឡាដែលមានមូលដ្ឋាន នៅលីបង់ផង  ដែរ។ ដូចក្រុមហាម៉ាសដែរ ក្រុមហេសបូឡា បានប្រឆាំងជាមួយអ៊ីស្រាអែល ខណៈដែលខ្លួនបាននិងកំពុងវាយលុកទឹកដីរបស់ខ្លួនជាបន្តបន្ទាប់។ កម្លាំងនៃការវាយប្រហាររបស់អ៊ីស្រាអែលទៅលើគោលដៅរបស់ក្រុមហេសបូឡា នៅភាគខាងត្បូងប្រទេសលីបង់ បានកើនឡើង ចាប់តាំងពីខែតុលា ឆ្នាំ ២០២៣។