នៅថ្ងៃពុធនេះ ក្រុមភ្នាក់ងារពន្លត់អគ្គិភ័យអ៊ីស្រាអែល បានពិនិត្យមើលការខូចខាត ហើយព្យាយាមគ្រប់គ្រងអគ្គិភ័យ ដែលបានឆាបឆេះឡើង ក្រោយការវាយប្រហារដោយគ្រាប់រ៉ុក្កែតរបស់ក្រុមហេសប៊ូឡា ចេញពីប្រទេសលីបង់ ទៅលើទីក្រុងតូច-ធំនៅតាមព្រំដែនអ៊ីស្រាអែល ។

សំឡេងសឺរ៉ែន ត្រូវបានថតជាប់ក្នុងកាមេរ៉ា នៅទីក្រុង Nahariya របស់អ៊ីស្រាអែល ជាប់ព្រំដែនជាមួយលីបង់ នៅភាគខាងជើងព្រំដែនរបស់ពួកគេ និងនៅភាគខាងលិចស្ថិតជាប់សមុទ្រមេឌីទែរ៉ាណេ ។

នៅភាគខាងកើតព្រំដែនអ៊ីស្រាអែល-លីបង់ ជិតទីក្រុង Kiryat Shmona អគ្គិភ័យ បានឆាបឆេះឡើង ក្រោយរ៉ុក្កែតបាញ់ចេញពីលីបង់ ។ ចំណែកឯអគាររស់នៅក្នុងទីក្រុង បានរងការខូចខាតផងដែរ ។

សេចក្តីប្រកាសរបស់អ្នកនាំពាក្យកងទ័ពអ៊ីស្រាអែល និយាយថា កាំជ្រួចផ្លោងជាង ២០គ្រាប់ ត្រូវបានបញ្ជាក់ថា បានបាញ់ចេញពីប្រទេសលីបង់ ចូលទៅក្នុងតំបន់ជាច្រើនរបស់អ៊ីស្រាអែល ហើយកាំជ្រួចផ្លោងមួយចំនួន ត្រូវបានស្កាត់ជាប់ ប៉ុន្តែគ្មានសេចក្តីរាយការណ៍ពីអ្នករងរបួសនោះទេ ៕