ប្រទេសបេឡារុស ដែលជាសម្ព័ន្ធមិត្តជិតស្និទ្ធរបស់រុស្ស៊ី នៅថ្ងៃពុធ (ទី១៧ ខែកក្កដា) នេះ បាននិយាយថា ខ្លួននឹងដាក់ឲ្យប្រើប្រាស់ប្រព័ន្ធលើកលែងទិដ្ឋាការរយៈពេល ៩០ថ្ងៃ សម្រាប់ពលរដ្ឋនៃបណ្តាប្រទេសអឺរ៉ុបចំនួន ៣៥ ដោយនេះជាសញ្ញាមួយដែលទីក្រុង Minsk ប្រហែលជាចង់បន្ធូរបន្ថយភាពតានតឹងជាមួយលោកខាងលិច។

ក្រោមគោលនយោបាយថ្មីនេះ ពលរដ្ឋនៃប្រទេសចុះបញ្ជីចំនួន ៣៥ ដែលរួមមានទាំងអាល្លឺម៉ង់ អង់គ្លេស និងបារាំងផងដែរ នឹងអាចចូលប្រទេសបេឡារុសដោយគ្មានទិដ្ឋាការ និងស្នាក់នៅរហូតដល់ ៩០ថ្ងៃ ក្នុង ១ឆ្នាំ។

បច្ចុប្បន្ននេះ អ្នកធ្វើដំណើរមកពីប្រទេសទាំងនោះ អាចស្នាក់នៅបេឡារុស បានតែ ៣០ថ្ងៃប៉ុណ្ណោះ ហើយត្រូវហោះហើរចូលតាមអាកាសយានដ្ឋាន នៅទីក្រុង Minsk។ សេវាព្រំដែនជាតិ បានឲ្យដឹងនៅក្នុងសេចក្តីថ្លែងការណ៍មួយថា គោលនយោបាយថ្មី ត្រូវចូលជាធរមាន នៅថ្ងៃសុក្រនេះ។

គួរបញ្ជាក់ថា ទីក្រុង Minsk ស្ថិតនៅក្រោមការដាក់ទណ្ឌកម្មរបស់លោកខាងលិច បន្ទាប់ពីប្រធានាធិបតី លោក Alexander Lukashenko ដែលកាន់អំណាចតាំងពីឆ្នាំ១៩៩៤ និងជាសម្ព័ន្ធមិត្តជិតស្និទ្ធរបស់មេដឹកនាំវិមានក្រឹមឡាំង លោក Vladimir Putin បានអនុញ្ញាតឲ្យរុស្ស៊ីប្រើប្រាស់ទឹកដីបេឡារុស ដើម្បីបញ្ជូនកងទ័ពរាប់ពាន់នាក់ចូលទៅក្នុងប្រទេសអ៊ុយក្រែន នៅឆ្នាំ២០២២៕