អាមេរិក៖ ប្រធានាធិបតី Joe Biden បានប្ដេជ្ញាបន្តការវាយប្រហារតាមអាកាសប្រឆាំងនឹងក្រុមជ្រុលនិយមអ៊ីស្លាម ដែលបានបំផ្ទុះគ្រាប់បែកអត្តឃាតនៅច្រកអាកាសយានដ្ឋានមួយ បានសម្លាប់ជនជាតិអាហ្វហ្គានីស្ថានជាង ១០០នាក់ និងសមាជិកកងកម្លាំងអាមេរិកចំនួន ១៣នាក់កាលពីសប្ដាហ៍មុន។
ទីប្រឹក្សាសន្តិសុខជាតិរបស់លោកប្រធានាធិបតី Joe Biden គឺលោក Jake Sullivan បាននិយាយកាលពីថ្ងៃអាទិត្យថា សហរដ្ឋអាមេរិកមានសមត្ថភាពជម្លៀសពលរដ្ឋអាមេរិកប្រមាណ ៣០០នាក់ដែលនៅសេសសល់នៅអាហ្វហ្គានីស្ថាន ដែលចង់ចាកចេញមុនថ្ងៃកំណត់របស់ប្រធានាធិបតីនៅថ្ងៃអង្គារស្អែកនេះ ខណៈដែលការវាយប្រហារដោយយានដ្រូនមួយទៀតរបស់អាមេរិក ប្រឆាំងនឹងក្រុមសកម្មប្រយុទ្ធរដ្ឋអ៊ីស្លាមបានបង្ហាញពីការគំរាមកំហែងយ៉ាងធ្ងន់ធ្ងរ ក្នុងរយៈពេលប៉ុន្មានថ្ងៃចុងក្រោយនៃសង្គ្រាម។
រដ្ឋមន្ត្រីការបរទេសអាមេរិក លោក Antony Blinken បាននិយាយមិនយូរប៉ុន្មានមុនការបញ្ជាក់ពីការវាយប្រហារតាមអាកាសនៅរដ្ឋធានីកាប៊ុលថា នេះគឺជាពេលវេលាដ៏គ្រោះថ្នាក់បំផុតនៅក្នុងបេសកកម្មដ៏គ្រោះថ្នាក់ ដែលមានរួចទៅហើយក្នុងរយៈពេលប៉ុន្មានថ្ងៃចុងក្រោយនេះ។ លំហូរនៃការជម្លៀសជនជាតិអាមេរិកនៅតែមានល្បឿនលឿន ខណៈការជូនដំណឹងថ្មីស្ដីពីសន្តិសុខរបស់ក្រសួងការបរទេស ដែលបានចេញប៉ុន្មានម៉ោងមុនពេលប្រតិបត្តិការយោធា បានណែនាំប្រជាជនឱ្យចាកចេញពីតំបន់ព្រលានយន្តហោះភ្លាមៗ “ដោយសារតែមានការគំរាមកំហែងជាក់លាក់គួរឱ្យទុកចិត្ត”៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
