គ្រឿងញៀនជិត៩គីឡូក្រាម និងជនសង្ស័យម្នាកើជាជនជាតិវៀតណាម ត្រូវបាន​សមត្ថកិច្ច​ខេត្ត​ស្វាយរៀងធ្វើការចាប់ឃាត់ខ្លួនក្នុងពេលដឹកជញ្ជូននៅភូមិសាស្ត្រទឹកដីស្រុកស្វាយទាប។ 

​សមត្ថកិច្ច ឲ្យដឹងនៅថ្ងៃទី១៧ ខែកក្កដានេះ ថា ដោយអនុវត្ត​តាមបទ​បញ្ជា​ដ៏ម៉ឺងម៉ាត់​របស់​លោក​ឧត្តម​សេនីយ៍ទោ ពេជ្រ វីរ: ស្នងការនគរបាលខេត្ត និងដឹកនាំបញ្ជាផ្ទាល់ពីលោកឧត្តមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន លោកឧត្តមសេនីយ៍ត្រី ប៉ាន់ ស៊ីរ៉ូ ស្នង​ការ​រង​ទទួលផែនការងារព្រំដែន និងលោកវរសេនីយ៍ទោ គង់ សាគុន ស្នងការរង​ទទួល​ដឹកនាំ​វរ​សេនាតូចនគរបាលការពារព្រំដែនគោកលេខ៦១១ព្រមទាំងមានការសម្របសម្រួលផ្ទាល់ពីលោកដូរ៉ា អង្គប្រទានព្រះរាជអាជ្ញារងនៃអយ្យការ អមសាលាដំបូងខេត្តស្វាយរៀង នៅថ្ងៃទី១២ ខែកក្កដា ឆ្នាំ២០២៤ វេលាម៉ោង៥:៣០នាទី នៅចំណុចផ្លូវខ្សែក្រវាត់ព្រំដែនចន្លោះ​បង្គោល​ព្រំដែន​លេខ១៦១-១៦២/ ១ស្ថិតក្នុង ភូមិ អូតាមោ ឃុំ មនោរម្យ ស្រុក ស្វាយទាប ខេត្តស្វាយរៀង កម្លាំងប៉ុស្តិ៍នគរបាលច្រកទ្វាតំបន់ព្រំដែន ព្រៃតាអី វរសេនាតូចការពារ​ព្រំដែន៦១១បានចេញល្បាតនៅតាមបន្ទាត់ខ្សែក្រវាត់ព្រំដែន។ 

 ប្រភពបានបន្តទៀតថាខណៈកំពុងចេញចំណុចខាងលើក៏បានជួបមុខសញ្ញាសង្ស័យជនជាតិវៀតណាមចំនួន០២នាក់ជិះម៉ូតូ០២គ្រឿង ដោយមានការសង្ស័យសមត្ថកិច្ចក៏បានហៅឱ្យឈប់ដើម្បីត្រួតពិនិត្យកញ្ចប់កេសអីវ៉ាន់ដែលជនសង្ស័យដឹកតាមម៉ូតូ ពេលនោះជនសង្ស័យដឹងខ្លួនក៏ផ្តួលម៉ូតូនិងកញ្ចប់អីវ៉ាន់ចោលរួចរត់គេចខ្លួនចូលទៅក្នុងទឹកដីប្រទេសវៀតណាម នៅពេលកម្លាំងដេញតាមជនសង្ស័យនោះជនសង្ស័យក៏បានដកអាវុធខ្លីបាញ់សំដៅមកលើសមត្ថកិច្ចជាច្រើនគ្រាប់ តែមិនបង្កឱ្យមានគ្រោះថ្នាក់មកលើកម្លាំងនោះទេ។ 

  នៅពេលត្រួតពិនិត្យកេសអីវ៉ាន់ដែលជនសង្ស័យទម្លាក់ចោលសមត្ថកិច្ចបានឆែកក្នុងកេសអីវ៉ាន់ឃើញមានវត្ថុតាងមួយចំនួនរួមមាន ម្សៅក្រាមពណ៌សថ្លាជាថ្នាំញៀនប្រភេទកេតាមីនចំនួន០៩កញ្ចប់ ទម្ងន់សុទ្ធ៨៨៦៣,៧៣ក្រាម(៨គីឡូ៨៦៣.៧៣ក្រាម), បង់អាវុធខ្លី០១ មានគ្រាប់០៤គ្រាប់, សំបកផ្ទុះ០៣  ម៉ូតូ០២គ្រឿង និងអត្តសញ្ញាណប័ណ្ណជនជាតិវៀតណាម០១សន្លឹក។ 

 តាមរយៈកិច្ចសហប្រតិបត្តិការនៃការបញ្ជូនព័ត៌មានពីសមត្ថកិច្ចកម្ពុជាបានទាន់ពេលវេលានៅវេលាម៉ោង០៧ព្រឹកក្នុងថ្ងៃដដែល សមត្ថកិច្ចវៀតណាមបានបន្តស្រាវជ្រាវ និងឃាត់ខ្លួនជនសង្ស័យជាជនជាតិវៀតណាមបាន០១នាក់នៅក្នុងទឹកដីប្រទេសវៀតណាម រីឯបក្ខពួកម្នាក់ទៀតកំពុងរត់គេចខ្លួន។ 

បច្ចុប្បន្ន សំណុំរឿងរួមជាមួយវត្ថុតាងត្រូវបានកម្លាំងជំនាញផែនការងារ​ប្រឆាំងគ្រឿងញៀន​បញ្ជូនទៅកាន់សាលាដំបូងខេត្តដើម្បីចាត់ការបន្តតាមច្បាប់៕