បេក្ខជនប្រធានាធិបតីមកពីបក្សសាធារណរដ្ឋ លោក Donald Trump បាននិយាយថា លោកគាំទ្រកម្មវិធីវីដេអូខ្លី ទីកតុក (TikTok) ខណៈលទ្ធភាពនៃការហាមឃាត់លើអេប (App) នេះខិតកាន់តែកៀក ប្រសិនបើក្រុមហ៊ុនមេរបស់ចិន បៃឌែនស៍ (ByteDance) បរាជ័យក្នុងការលក់ទ្រព្យសម្បត្តិ TikTok របស់សហរដ្ឋអាមេរិក។

លោក Trump បានប្រាប់កម្មវិធីព័ត៌មានធុរកិច្ច ប្លូមប៊ឺក (Bloomberg Businessweek) ក្នុងបទសម្ភាសន៍ដែលបានចេញផ្សាយកាលពីថ្ងៃ អង្គារ (១៦ កក្កដា) ថា «ខ្ញុំគាំទ្រ TikTok ព្រោះយើងត្រូវការការប្រកួតប្រជែង។ បើមិនមាន TikTok ទេក៏នៅតែមាន ហ្វេសប៊ុក (Facebook) និង អ៊ីនស្តាក្រាម (Instagram) ដែរ»។

លោក Trump ពីមុនបានហៅ TikTok ថាជាការគំរាមកំហែង ប៉ុន្តែបន្ទាប់មកបានបង្កើតគណនី TikTok ក្នុងខែមិថុនា។ លោក Trump ដែលបានរិះគន់ Facebook និង Instagram ចំពោះការផ្អាកគណនីលោកអស់ ២ឆ្នាំបន្ទាប់ពីកុបកម្មនៅវិមានកាពីតូល (Capitol) កាលថ្ងៃទី០៦ ខែមករា ឆ្នាំ២០២១ បានប្រាប់អ្នកសម្ភាសន៍កាលពីខែមិថុនាថា លោកនឹងមិនគាំទ្រឱ្យមានការហាមឃាត់ TikTok ទេ។

ក្នុងពេលធ្វើជាប្រធានាធិបតី លោក Trump បានព្យាយាមហាមឃាត់ TikTok និង វីឆាត (WeChat) ដែលជាកម្មសិទ្ធិរបស់ចិន ក្នុងឆ្នាំ២០២០ ប៉ុន្តែត្រូវបានរារាំងដោយតុលាការ។ នៅខែមិថុនា ឆ្នាំ២០២១ លោកប្រធានាធិបតី Joe Biden បានដកចេញនូវបទបញ្ជាប្រតិបត្តិជំនាន់លោក Trump ទាំងនោះ ប៉ុន្តែក្រោយមកបានចុះហត្ថលេខាកាលពីថ្ងៃទី២៤ ខែមេសា លើច្បាប់ដែលផ្តល់ឱ្យ ByteDance រហូតដល់ថ្ងៃទី១៩ មករា ដើម្បីលក់ TikTok បើមិនដូច្នេះទេនឹងប្រឈមការហាមឃាត់៕