ក្រុមមនុស្សធម៌របស់អង្គការសហប្រជាជាតិ បាននិយាយកាលពីថ្ងៃពុធថា យោធាអ៊ីស្រាអែល បានបញ្ឈប់បេសកកម្មផ្តល់ជំនួយទាំងអស់ ទៅកាន់ភាគខាងជើងក្រុង Wadi តំបន់ហ្កាហ្សា ដោយរារាំងប្រជាជនហ្កាហ្សារាប់សែននាក់ មិនឲ្យទទួលបានជំនួយមនុស្សធម៌របស់អង្គការសហប្រជាជាតិ។

ការិយាល័យសម្រាប់ការសម្របសម្រួលកិច្ចការមនុស្សធម៌អង្គការសហប្រជាជាតិ(OCHA) បាននិយាយថា នេះមានន័យថា បុគ្គលិកមនុស្សធម៌ មិនអាចប្រមូលគ្រឿងផ្គត់ផ្គង់ពីចំណុចច្រកចូលភាគខាងជើងក្រុង Erez West បានទេ។

ការិយាល័យសម្រាប់ការសម្របសម្រួលកិច្ចការមនុស្សធម៌អង្គការសហប្រជាជាតិ(OCHA) និយាយថា ខ្លួនបានសង្កេតឃើញជនភៀសខ្លួនកាន់តែច្រើនឆ្លងកាត់ពីទីក្រុងហ្កាហ្សា ចូលទៅកាន់ទីក្រុង Deir al Balah ដោយមានមនុស្សយ៉ាងហោចណាស់៤៥០នាក់ កាលពីថ្ងៃពុធ បើធៀបទៅនឹងចំនួនជាង ១.០០០នាក់ កាលពីសប្តាហ៍មុន។

អ្នកមកដល់ថ្មីមួយចំនួន បានប្រាប់បុគ្គលិកផ្តល់ជំនួយថា ទាហានអ៊ីស្រាអែល បានបាញ់ទៅលើអ្នកទាំងឡាយណាដែលព្យាយាមឆ្លងកាត់ ដោយបង្ខំឱ្យពួកគេមួយចំនួនបកក្រោយ។ អង្គការ OCHA និយាយថា មានការរាយការណ៍ពីប្រជាជននៅខាងត្បូងក្រុង Wadi តំបន់ហ្កាហ្សាថា មានការបាញ់ប្រហារ ខណៈពេលកំពុងរង់ចាំសាច់ញាតិរបស់ពួកគេ ឆ្លងកាត់ចូលទៅក្នុងទីក្រុង Deir al Balah ។

ការិយាល័យមនុស្សធម៌ បាននិយាយជាថ្មីថា ជនស៊ីវិលនៅតំបន់ហ្កាហ្សា ត្រូវតែបានការពារ ហើយតម្រូវការចាំបាច់របស់ពួកគេត្រូវតែបានបំពេញ នៅគ្រប់ទីកន្លែងដែលពួកគេស្នាក់នៅ។

លោក Philippe Lazzarini ប្រធានទីភ្នាក់ងារផ្តល់ជំនួយសម្រាប់ប្រជាជនប៉ាឡេស្ទីនរបស់អង្គការសហប្រជាជាតិ ដែលត្រូវបានគេស្គាល់ថា ទីភ្នាក់ងារ UNRWA បាននិយាយថា ក្នុងរយៈពេល ១០ថ្ងៃចុងក្រោយនេះ យ៉ាងហោចណាស់សាលារៀនចំនួន៨កន្លែង នៅក្នុងតំបន់ហ្កាហ្សា ត្រូវបានវាយប្រហារ។ លោក និយាយថា ភាគីណាមួយក៏ដោយ មិនត្រូវប្រើប្រាស់សាលារៀន សម្រាប់ការប្រយុទ្ធ ឬគោលបំណងយោធាឡើយ។