​ចិន៖ ក្រសួងការបរទេស​ចិន​បាន​និយាយថា ទីប្រឹក្សា​រដ្ឋ​ចិន និង​ជា​រដ្ឋមន្ត្រីការបរទេស លោក Wang Yi ​បាន​ប្រាប់​រដ្ឋមន្ត្រីការបរទេស​អាមេរិក​ លោក Antony Blinken នៅក្នុង​ការសន្ទនា​តាម​ទូរស័ព្ទ​កាលពី​ថ្ងៃអាទិត្យ​ថា​ សហគមន៍​អន្តរជាតិ​គួរតែ​ចូលរួម​ជាមួយ​មេដឹកនាំ​តា​លី​បង់​ថ្មី​របស់​អា​ហ្វ​ហ្គា​នី​ស្ថាន​ និង​ណែនាំ​ពួកគេ​ក្នុង​ជំហរ​វិជ្ជមាន​។

​លោក​ Wang​ បាន​និយាយ​ថា ខណៈ​គោរព​អធិបតេយ្យភាព​អា​ហ្វ​ហ្គា​នី​ស្ថាន អាមេរិក​គួរតែ​ចាត់វិធានការ​ប្រកបដោយ​ប្រសិទ្ធភាព​ ដើម្បី​ជួយ​អា​ហ្វ​ហ្គា​នី​ស្ថាន​ប្រយុទ្ធ​ប្រឆាំង​ភេរវកម្ម​ និង​បញ្ឈប់​អំពើ​ហិង្សាប្រសើរ​ជាង​លេង​ស្តង់ដារ​ពីរ ឬ​ប្រយុទ្ធ​ប្រឆាំង​ភេរវកម្ម​តាមតែ​ចិត្ត​ខ្លួនឯង ​ដោយ​ព្រមាន​ថា ”​ការ​ដក​ទ័ព​យ៉ាង​តក់ក្រហល់​អាច​ហុច​ឱ្យ​ក្រុម​ភេរ​វករ​ប្រមូល​ផ្តុំ ​ហើយ​ត្រលប់​មកវិញ​កាន់​តែ​ខ្លាំង​ជាង​មុន​”។ ​យោង​តាម​សេចក្ដីថ្លែងការណ៍ លោក Wang បាន​និយាយ​ថា ទីក្រុង​វ៉ាស៊ីនតោន​គួរតែ​ធ្វើការ​ជាមួយ​សហគមន៍​អន្តរជាតិ ​ដើម្បី​ផ្តល់​ជំនួយ​សេដ្ឋកិច្ច​ និង​មនុស្សធម៌​ដល់​អា​ហ្វ​ហ្គា​នី​ស្ថាន ​ជួយ​ឱ្យ​របប​ថ្មី​ដំណើរការ​មុខងារ​រដ្ឋាភិបាល​ជា​ធម្មតា រក្សា​ស្ថិរភាព​សង្គម និង​បញ្ឈប់​ការ​ធ្លាក់​ចុះ​រូបិយប័ណ្ណ និង​លើកស្ទួយ​ជីវភាព​រស់នៅ​របស់​ប្រជាពលរដ្ឋ​កាន់តែ​ល្អ​ប្រសើរ​ឡើង​។​

​អ្នកនាំពាក្យ​ក្រសួងការបរទេស​អាមេរិក ​លោក Ned Price បាន​និយាយ​នៅ​ក្នុង​សេចក្ដីថ្លែងការណ៍​មួយ​ថា លោក Blinken និង​លោក Wang បាន​និយាយ​អំពី​ “សារៈសំខាន់​នៃ​សហគមន៍​អន្តរជាតិ​ដែល​ធ្វើ​ឱ្យ​ក្រុម​តា​លី​បង់​ទទួលខុសត្រូវ ​ចំពោះ​ការ​ប្ដេជ្ញា​ចិត្តជា​សាធារណៈ​ដែល​ពួកគេ​បាន​ធ្វើ​ ទាក់ទង​នឹង​ផ្លូវ​ឆ្លងកាត់​ប្រកបដោយ​សុវត្ថិភាព និង​សេរីភាព​ក្នុង​ការ​ធ្វើដំណើរ​សម្រាប់​ជនជាតិ​អា​ហ្វ​ហ្គា​នី​ស្ថាន ​និង​ជនបរទេស​”៕

អត្ថបទ៖ សុខមាន