ក្រុមបាតុករនិស្សិត ដែលកំពុងទាមទារឱ្យបញ្ចប់ប្រព័ន្ធកូតាសម្រាប់ការងាររដ្ឋាភិបាល ក្នុងប្រទេសបង់ក្លាដែស នៅថ្ងៃព្រហស្បតិ៍នេះ បានអំពាវនាវឲ្យបិទប្រទេសទាំងស្រុង បន្ទាប់ពីការប៉ះទង្គិចគ្នាខ្លាំង នៅសប្តាហ៍នេះ ដែលបានបណ្តាលឲ្យមនុស្ស៦នាក់ស្លាប់ និងរាប់រយនាក់រងរបួស។ 

ដោយមានកំហឹងទៅនឹងភាពអត់ការងារធ្វើរបស់យុវជន មានចំនួនជិត៣២លាននាក់ ឬការសិក្សាក្នុងចំណោមប្រជាជនចំនួន១៧០លាននាក់ និស្សិតបានជំរុញ ឱ្យលុបចោលកូតាការងារបម្រុងទុក៣០% សម្រាប់គ្រួសារអ្នកតស៊ូដើម្បីសេរីភាព។

អ្នកសម្របសម្រួលការតវ៉ា លោក Nahid Islam បាននិយាយថា យើងនឹងបន្តផែនការរបស់យើងសម្រាប់ការបិទប្រទេសទាំងស្រុង គ្រប់គ្រឹះស្ថានទាំងអស់នឹងត្រូវបិទ។ មានតែមន្ទីរពេទ្យ និងសេវាសង្គ្រោះបន្ទាន់ប៉ុណ្ណោះ ដែលទុកនៅដំណើរការ ដោយសេវាកម្មរថយន្តគិលានសង្គ្រោះ គឺជាមធ្យោបាយដឹកជញ្ជូនតែមួយគត់ ដែលត្រូវបានអនុញ្ញាត។ ការិយាល័យរដ្ឋាភិបាល និងឯកជន ជាច្រើន បើកដំណើរការនៅថ្ងៃព្រហស្បតិ៍នេះ នៅក្នុងរដ្ឋធានីដាកា ដោយមានកង់បី និងម៉ូតូ នៅតាមដងផ្លូវ ទោះបីជារថយន្តក្រុងសាធារណៈ មានចំនួនតិចជាងថ្ងៃធម្មតាក៏ដោយ។

អាជ្ញាធរ បានបិទសាកលវិទ្យាល័យរដ្ឋ និងឯកជនទាំងអស់ ដោយគ្មានពេលកំណត់ ចាប់តាំងពីថ្ងៃពុធ ហើយបានបញ្ជូននគរបាលបង្ក្រាបកុបកម្ម និងកម្លាំងយោធាប៉ារ៉ាការពារព្រំដែន ទៅកាន់បរិវេណសាកលវិទ្យាល័យ ដើម្បីធានាបាននូវច្បាប់ និងសណ្តាប់ធ្នាប់។

ការតវ៉ា គឺជាបញ្ហាប្រឈមដ៏សំខាន់ដំបូងសម្រាប់រដ្ឋាភិបាលរបស់នាយករដ្ឋមន្ត្រី លោកស្រី Sheikh Hasina ចាប់តាំងពីលោកស្រី បានឈ្នះអាណត្តិទីបួនជាប់ៗគ្នា ក្នុងខែមករា នៅក្នុងការបោះឆ្នោតមួយ ដែលត្រូវបានធ្វើពហិការដោយគណបក្សជាតិនិយមបង់ក្លាដែស (BNP) ជាគណបក្សប្រឆាំង។

នៅក្នុងសុន្ទរកថាទៅកាន់ប្រជាជាតិ កាលពីថ្ងៃពុធ លោកស្រី Hasina បានសន្យាថា រដ្ឋាភិបាលរបស់លោកស្រី នឹងបង្កើតគណៈកម្មការតុលាការ ដើម្បីស៊ើបអង្កេតការស្លាប់ បន្ទាប់ពីនគរបាល បានបាញ់គ្រាប់កាំភ្លើង និងឧស្ម័នបង្ហៀរទឹកភ្នែក ដើម្បីបំបែកក្រុមអ្នកតវ៉ា។