នៅក្នុងបទសម្ភាសន៍មួយ កាលពីថ្ងៃពុធ (ទី១៧ ខែកក្កដា) ប្រធានាធិបតីអាមេរិក លោក Joe Biden បានព្រលយពាក្យថា លោកនឹងពិចារណាឡើងវិញនូវការសម្រេចចិត្តរបស់លោក ក្នុងការឈរឈ្មោះជាលើកទី២ ប្រសិនបើវេជ្ជបណ្ឌិតប្រាប់លោកថា លោកមានបញ្ហាសុខភាព។

ដោយមានការអំពាវនាវជាបន្តបន្ទាប់ឲ្យលោកបោះបង់ចោលការប្រកួតប្រជែង ហើយនិងការបន្តមានសំណួរទាក់ទងនឹងអាយុ និងភាពរឹងមាំនៃផ្លូវចិត្តរបស់លោក ក្នុងបទសម្ភាសន៍នោះ ពិធីករលោក Ed Gordon របស់ប្រព័ន្ធផ្សព្វផ្សាយ BET News បានសួរលោកប្រធានាធិបតីថា តើមានអ្វីដែលធ្វើឲ្យលោកផ្លាស់ប្តូរគំនិត អំពីការបន្តការប្រកួតប្រជែងដែរ ឬទេ?

លោក Biden បានឆ្លើយតបថា៖ «ប្រសិនបើខ្ញុំមានបញ្ហាសុខភាពមួយចំនួនលេចឡើង។ ប្រសិនបើគ្រូពេទ្យមករកខ្ញុំ ហើយនិយាយថា អ្នកមានបញ្ហានេះ ឬអ្នកមានបញ្ហានោះ។ ប៉ុន្តែយ៉ាងណាក្ដី ខ្ញុំបានបង្កើតកំហុសយ៉ាងធ្ងន់ធ្ងរ ក្នុងការជជែកដេញដោលទាំងមូល»។

ជាមួយគ្នានេះដែរ លោកប្រធានាធិបតីក៏បាននិយាយការពារការសម្រេចចិត្តរបស់លោក ក្នុងការមិនធ្វើជាប្រធានាធិបតីអន្តរកាល និងការឈរឈ្មោះម្តងទៀត ដោយលើកហេតុផលថា ប្រទេសដែលមានការបែកបាក់គ្នា បណ្តាលឲ្យលោកចង់បន្តនៅសេតវិមាន។ លោកបានប្រាប់បន្ថែមថា៖ «នៅមានអ្វីជាច្រើនទៀតដែលត្រូវធ្វើ ហើយខ្ញុំពិតជារារែកណាស់ ក្នុងការដើរចេញពីបញ្ហាទាំងនោះ»។

បញ្ហាអាយុ និងសុខភាពរបស់លោកប្រធានាធិបតី ស្ថិតក្នុងចំណាប់អារម្មណ៍កាន់តែខ្លាំងឡើងៗ ចាប់តាំងពីការធ្វើមិនបានល្អក្នុងការជជែកដេញដោល កាលពីខែមុន ទល់នឹងអតីតប្រធានាធិបតី លោក Donald Trump ដោយសារលោកពិបាកបញ្ចប់គំនិតរបស់លោក ហើយនិយាយដោយសំឡេងខ្សាវៗ ពោលគឺមានសំឡេងស្អក។

គួរបញ្ជាក់ដែរថា នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ ABC កាលពីដើមខែនេះ លោក Biden បាននិយាយការពារសុខភាពរបស់លោក ហើយបានទទូចថា ការជជែកដេញដោលគ្នាមិនមែនជាការបង្ហាញពីស្ថានភាពធ្ងន់ធ្ងរណាមួយឡើយ ហើយបាននិយាយថា លោកអស់កម្លាំងពីការធ្វើដំណើរបរទេសនាពេលថ្មីៗនេះ៕