ព្រះសីហនុ៖ សាខាកាកបាទក្រហមកម្ពុជាខេត្តព្រះសីហនុ ចុះសួរសុខទុក្ខ និងនាំយកអំណោយមនុស្សធម៌ជូនប្រជាពលរដ្ឋងាយរងគ្រោះដោយខ្យល់កន្ត្រាក់ ៤គ្រួសារ ស្ថិតនៅក្នុងភូមិសាស្ដ្រឃុំសំរុង និងឃុំទួលទទឹង ស្រុកព្រៃនប់ ខេត្តព្រះសីហនុ ថ្ងៃទី១៨ ខែកក្កដា ឆ្នាំ២០២៤ ។ 

ដោយមានការយកចិត្តទុកដាក់ខ្ពស់ចំពោះសុខទុក្ខប្រជាពលរដ្ឋ ឯកឧត្តម ម៉ាង ស៊ីណេត ប្រធានស្ដីទីគណៈកម្មាធិការសាខាកាកបាទក្រហមកម្ពុជាខេត្តព្រះសីហនុ បានចាត់ឱ្យនាយកសាខា ប្រធានគណៈកម្មាធិការអនុសាខាស្រុកព្រៃនប់ មន្រ្តីអនុសាខា និងអ្នកស្ម័គ្រចិត្ត នាំយកអំណោយរបស់សាខាកាកបាទក្រហមខេត្តជូនដល់ប្រជាពលរដ្ឋងាយរងគ្រោះដោយខ្យល់កន្ត្រាក់ចំនួន ៤គ្រួសារ ។ នេះគឺជាការឱ្យដឹងពីលោក គាំ សុខុម នាយកសាខាកាកបាទក្រហមស្រុកព្រៃនប់ ។

លោក បាននាំនូវប្រសាសន៍ផ្ដាំផ្ញើសួរសុខទុក្ខ និងក្ដីនឹករលឹក អាណិតអាសូរក្រៃលែងពីសំណាក់ ឯកឧត្តម ប្រធានស្ដីទីគណៈកម្មាធិការសាខា ជាពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្ដាំផ្ញើសាកសួរសុខទុក្ខជូនដល់បងប្អូនប្រជាពលរដ្ឋរងគ្រោះដោយក្តីនឹករលឹក និងតែងតែគិតគូរជានិច្ចអំពីសុខទុក្ខរបស់ប្រជាពលរដ្ឋទាំងអស់ ដោយមិនប្រកាន់ពូជសាសន៍ សាសនា ឬនិន្នាការនយោបាយអ្វីឡើយ។ អំណោយ សម្ភារសាខាផ្ដល់ជូនមួយគ្រួសារទទួលបាន អង្ករ ១បាវ ស្មើនឹង ២៥គីឡូក្រាម គ្រឿងឧបភោគបរិភោគ របស់របរប្រើប្រាស់ និងថវិកា ចំនួន១០ម៉ឺនរៀល សម្រាប់គ្រួសាររងគ្រោះតិចតួច និងគ្រួសាររងផលប៉ះពាល់ធ្ងន់ធ្ងរ ទទួលបានថវិកាចំនួន២០ម៉ឺនរៀល ៕