បាល់ទាត់៖ ​ក្រុមបាល់ទាត់ Wolfsburg នៅតែ​បន្ត​ទំរង់​លេង​អស្ចារ្យ​របស់ខ្លួន​ក្នុង​រដូវ​កាល​ថ្មី​នេះ ​ក្រោយ​យកឈ្នះ RB Leipzig ដែល​ជា​ជ័យជំនះ ៣ប្រកួត​ផ្ទួនៗ​ឡើង​មក​កាន់កាប់​កំពូល​តារាង Bundesliga វិញ​។

​​គ្រាប់​បាល់​ជ័យជំនះ​របស់ Wolfsburg រក​បាន​ភ្លាមៗ​ក្រោយ​សម្រាក​វគ្គ​ទី១ ដោយ Jerome Roussillon​។ ​ក្រោម​ការដឹកនាំ​របស់​អ្នកចាត់ការ​ថ្មី​ លោក Mark van Bommel, Wolfsburg នៅពេលនេះ​ជា​ក្រុម​តែមួយគត់​នៅ Bundesliga រដូវ​កាល​ថ្មី​ដែល​ឈ្នះ​ទាំង ៣ប្រកួត​។​ ​Bayern Munich កំពុង​ឈរ​លេខ២ ក្រោយ​សប្តាហ៍​ទី៣ នេះ​បន្ទាប់ពី​បំបាក់ Hertha Berlin ៥-០ កាលពី​ថ្ងៃ​សៅរ៍​។ ​ខ្សែប្រយុទ្ធ​ប៉ូឡូញ Robert Lewandowski ជាថ្មី​ម្តងទៀត​រកបាន Hat-Trick ក្នុងការ​ប្រកួត​នេះ និង​ជា​គ្រាប់​បាល់​ទី៣០០ របស់ខ្លួន​ផងដែរ​។​

​Lewandowski នៅពេលនេះ​ស៊ុត​បញ្ចូល​ទី​ឱ្យ Bayern Munich ១៦ប្រកួត​ជាប់​គ្នា​គ្រប់​ក្របខណ្ឌ និង ១៣ប្រកួត​ជាប់​គ្នា​នៅ Bundesliga​។ ​Robert Lewandowski នៅពេលនេះ​ក៏​កំពុងស្ថិត​ក្នុង​គោលដៅ​របស់ Paris Saint Germain ផងដែរ​ដើម្បី​ជំនួស​តំណែង​របស់ Kylian Mbappe ដែល​អាច​នឹង​ចាក​ចេញ​ទៅ Real Madrid៕

​អត្ថបទ​៖​នាង សុភា​វុ​ធ