នគរបាល នៅថ្ងៃព្រហស្បតិ៍ (ទី១៨ ខែកក្កដា) នេះ បានបាញ់ឧស្ម័នបង្ហូរទឹកភ្នែក ដើម្បីបំបែកក្រុមបាតុករ ក្នុងប្រទេសបង់ក្លាដែស ខណៈដែលអាជ្ញាធរបានផ្ដាច់សេវាអ៊ីនធឺណិតតាមទូរសព្ទខ្លះៗ ស្របពេលដែលការប៉ះទង្គិចដោយហិង្សា ដែលបានបណ្ដាលឲ្យមនុស្ស ៦នាក់ ស្លាប់ និងរាប់រយនាក់ទៀត រងរបួសក្នុងសប្តាហ៍នេះ មិនមានសញ្ញាថមថយនោះឡើយ។

ហាង និងការិយាល័យជាច្រើន បានបើកដំណើរការ នៅក្នុងរដ្ឋធានី Dhaka ប៉ុន្តែមានរថយន្តក្រុងតិចជាងមុន នៅតាមដងផ្លូវ ដោយសារមានការអំពាវនាវឲ្យបិទទូទាំងប្រទេសពីនិស្សិត ដែលទាមទារឲ្យលុបចោលកូតាបម្រុងទុក ៣០ភាគរយ ទទួលបានការឆ្លើយតបតិចតួច។

នគរបាលបានបាញ់ឧស្ម័នបង្ហូរទឹកភ្នែក ដើម្បីបំបែកក្រុមនិស្សិតដែលគប់ដុំថ្ម និងដែលបានបិទផ្លូវហាយវេដ៏សំខាន់មួយ នៅក្នុងទីក្រុងកំពង់ផែភាគខាងត្បូង Chittagong ខណៈដែលសេវាទូរសព្ទចល័ត ត្រូវបានផ្អាក ដោយភាគច្រើន នៅទូទាំងប្រទេសអាស៊ីខាងត្បូងមួយនេះ។

អនុរដ្ឋមន្ត្រីក្រសួងព័ត៌មានវិទ្យា លោក Zunaid Ahmed Palak បានប្រាប់អ្នកសារព័ត៌មានថា៖ «អ៊ិនធឺណិតតាមទូរសព្ទចល័ត ត្រូវបានផ្អាកជាបណ្ដោះអាសន្ន ដោយសារមានការបង្កើតឡើងនូវពាក្យចចាមអារ៉ាម និងស្ថានការណ៍មិនមានស្ថិរភាពជាច្រើន នៅលើបណ្ដាញសង្គម»។ លោកបានបន្ថែមថា សេវានឹងត្រូវបានភ្ជាប់ឲ្យដំណើរការឡើងវិញ នៅពេលស្ថានការណ៍វិលមករកភាពប្រក្រតីដូចដើម។

គួរបញ្ចាក់ថា ការតវ៉ាគឺជាបញ្ហាប្រឈមដ៏ធំដំបូង ចំពោះរដ្ឋាភិបាលរបស់លោកស្រីនាយករដ្ឋមន្ត្រី Sheikh Hasina ចាប់តាំងពីលោកស្រី បានឈ្នះអាណត្តិទី ៤ ជាប់ៗគ្នា កាលពីខែមករា នៅក្នុងការបោះឆ្នោតមួយដែលត្រូវបានធ្វើពហិការដោយគណបក្សប្រឆាំងរបស់ប្រទេស គឺគណបក្សជាតិនិយមបង់ក្លាដែស (BNP)។

ដោយសារក្រេវក្រោធនឹងភាពអត់ការងារធ្វើរបស់យុវជន ដោយមានអ្នកគ្មានការងារ ឬបោះបង់ការសិក្សាចំនួនរហូតដល់ទៅ ៣២លាននាក់ ក្នុងចំណោមប្រជាជន ១៧០លាននាក់នោះ ពួកនិស្សិតកំពុងជំរុញឲ្យលុបចោលកូតាបម្រុងទុក ៣០ភាគរយ សម្រាប់គ្រួសារអ្នកតស៊ូ ដើម្បីសេរីភាព៕