ទីភ្នាក់ងារសារព័ត៌មាន Xinhua បានរាយការណ៍ថា បក្សកុម្មុយនីស្តចិន នៅថ្ងៃព្រហស្បតិ៍ (ទី១៨ ខែកក្កដា) នេះ បានទទួលយកលិខិតលាលែងពីតំណែងរបស់អតីតរដ្ឋមន្ត្រីការបរទេស លោក Qin Gang ពីគណៈកម្មាធិការមជ្ឈិមរបស់បក្ស អំឡុងកិច្ចប្រជុំដ៏សំខាន់មួយរបស់ស្ថាប័នប្រតិបត្តិកម្រិតកំពូលបំផុតរបស់បក្ស។

ជាមួយគ្នានេះ គណៈកម្មាធិការមជ្ឈិម បានឲ្យដឹងថា ខ្លួនបានសម្រេចដកអតីតរដ្ឋមន្ត្រីក្រសួងការពារជាតិ លោក Li Shangfu ក៏ដូចជាអតីតមេបញ្ជាការកងកម្លាំងរ៉ុក្កែតរបស់ PLA (កងទ័ពរំដោះប្រជាជន) គឺលោក Li Yuchao ពីបទ «បំពានវិន័យ និងច្បាប់យ៉ាងធ្ងន់ធ្ងរ» ដែលជាការប្រើពាក្យឲ្យស្រាលជាងពាក្យប្រព្រឹត្តអំពើពុករលួយ។

លោក Li Shangfu ត្រូវបានដកចេញពីបក្សកុម្មុយនីស្ត ក្នុងខែមិថុនា ក្រោមការចោទប្រកាន់ពីបទស៊ីសំណូក ខណៈដែលកងទ័ពរំដោះប្រជាជនចិន (PLA) អនុវត្តដំណើរការប្រឆាំងអំពើពុករលួយយ៉ាងទូលំទូលាយ ដែលបានពាក់ព័ន្ធនឹងអតីតរដ្ឋមន្ត្រីការពារជាតិ ២រូប និងឧត្តមសេនីយ៍ជាន់ខ្ពស់ ៩នាក់។

ចំណែកលោក Qin ត្រូវបានដកចេញពីតំណែងជារដ្ឋមន្ត្រីការបរទេសភ្លាមៗ នៅក្នុងខែកក្កដា ឆ្នាំ២០២៣ បន្ទាប់ពីបានបំពេញតួនាទីអស់រយៈពេល ៧ខែ ហើយមិនត្រូវបានគេឃើញជាសាធារណៈនោះឡើយ ចាប់តាំងពីពេលនោះមក។ 

ដោយឡែកលោក Li ត្រូវបានបញ្ចប់តំណែងជារដ្ឋមន្ត្រីការពារជាតិ កាលពីខែតុលាឆ្នាំមុន ដោយគ្មានការពន្យល់ទាំងអស់ មុនពេលត្រូវបានដាក់ឲ្យស្ថិតនៅក្រោមការស៊ើបអង្កេត ពាក់ព័ន្ធនឹងអំពើពុករលួយ៕