ភ្នំពេញ ៖ ក្លឹបអ្នកកាសែតកម្ពុជា និងសមាគមធានារ៉ាប់រងនៅកម្ពុជា នៅថ្ងៃទី១៨ កក្កដា ឆ្នាំ២០២៤នេះ បានសហការគ្នារៀបចំវេទិកាចែករំលែកព័ត៌មានអំពីបច្ចុប្បន្នភាពនៃទីផ្សារធានារ៉ាប់រងនៅកម្ពុជា ដើម្បីផ្តល់ឱកាសដល់អ្នកសារព័ត៌មានបានស្វែងយល់បន្ថែមទៀតអំពីព័ត៌មានថ្មីៗចុងក្រោយ និងជាជំនួយស្មារតីដល់ការសសេរអត្ថបទ និងការផ្សព្វផ្សាយអំពីវិស័យធានារ៉ាប់រងទៅកាន់សាធារណជនប្រកបដោយប្រសិទ្ធភាព និងភាពត្រឹមត្រូវ។

​វេទិកាចែករំលែកព័ត៌មាន «អំពីបច្ចុប្បន្នភាព នៃទីផ្សារធានារ៉ាប់រងនៅកម្ពុជា» នេះ បានប្រព្រឹត្តទៅក្រោមអធិបតីភាពឯកឧត្តម ប៊ូ ច័ន្ទភីរូ អគ្គនាយកនិយ័តករធានារ៉ាប់រងនៅកម្ពុជា និងមានការអញ្ជើញចូលរួមពី លោក ពុយ គា ប្រធានក្លិបអ្នកកាសែតកម្ពុជា, លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា និងមានការចូលរួមពីអ្នកសារព័ត៌មានចំនួនប្រមាណ ៧០នាក់ មកពីស្ថាប័នផ្សេងៗគ្នាចំនួន៥៨ស្ថាប័ន នៅសណ្ឋាគារហ៊្វែរហៀល បាយ ម៉ាវៀត ភ្នំពេញ។

ក្នុងកម្មវិធីនេះ លោក ហ៊ុយ រ៉ាថារ៉ូ បានលើកឡើងថា វេទិកានេះ ការចែករំលែកព័ត៌មានអំពីវិស័យធានារ៉ាប់រងនេះ មិនត្រឹមតែរួមចំណែកពង្រឹងសមត្ថភាពរបស់អ្នកសារព័ត៌មានទេ ប៉ុន្តែក៏នឹងរួមចំណែកក្នុងការបន្តលើកកម្ពស់គុណភាព ប្រសិទ្ធិភាព និងវិសាលភាព នៃការផ្សព្វផ្សាយព័ត៌មានទាក់ទងទៅនឹងទីផ្សារធានារ៉ាប់រងកាន់តែទូលំទូលាយបន្ថែមទៀត។ លើសពីនេះទៀត នឹងអាចជះឥទ្ធិពលវិជ្ជមានដោយប្រយោលទៅកាន់សាធារណជន តាមរយៈគុណភាពព័ត៌មានដែលនឹងត្រូវផ្សព្វផ្សាយចេញទៅ។

នៅក្នុងពិធីបើកវេទិកានេះ ឯកឧត្តម ប៊ូ ច័ន្ទភីរូ បានចាត់ទុកអ្នកសារព័ត៌មានថា គឺជាបុគ្គលដ៏សំខាន់ក្នុងការផ្សព្វផ្សាយព័ត៌មានពិតប្រាកដ និងច្បាស់លាស់ជូនសាធារណជន។ ឯកឧត្តមរំពឹងទៀតថា សាធារណជនទាំងអស់ នឹងទទួលបានព័ត៌មានត្រឹមត្រូវ និងកាន់តែទូលំទូលាយថែមទៀត ជាពិសេសផ្តល់ទំនុកចិត្តជាងមុនមកលើវិស័យធានារ៉ាប់រង ដើម្បីឲ្យវិស័យនេះបានរួមចំណែកកាន់តែច្រើនឡើង ក្នុងការពង្រឹងភាពធន់ ខណៈវិស័យមួយនេះ ត្រូវបានទទួលជាទូទៅ ជាពិសេសនៅក្នុងបណ្តាប្រទេសដែលមានសេដ្ឋកិច្ចជឿនលឿន ដោយសារជាសំណាញ់សុវត្ថភាពហិរញ្ញវត្ថុ ដែលជួយក្រុមគ្រួសារ និងធុរកិច្ចនានា ឲ្យបានរួចផុតពីទុក្ខលំបាកផ្នែកហិរញ្ញវត្ថុ នៅពេលមានគ្រោះអកុសលកើតឡើង។

 សូមជម្រាបជូនទៀតថា នៅក្នុងវេទិកាចែករំលែកព័ត៌មាន «អំពីបច្ចុប្បន្នភាព នៃទីផ្សារធានារ៉ាប់រងនៅកម្ពុជា» នេះដែរ ក៏បានផ្តល់ឱកាសដល់អ្នកសារព័ត៌មាន បានលើកជាសំណួរផ្សេងៗទាក់ទងនឹងវិស័យធានារ៉ាប់រងនៅកម្ពុជា ដើម្បីវាគ្មិនបានបកស្រាយ និងពន្យល់បន្ថែមផងដែរ.

 គិតរហូតមកដល់បច្ចុប្បន្ននេះ កម្ពុជាមានក្រុមហ៊ុនធានារ៉ាប់រងចំនួន ៤០ក្រុមហ៊ុន ក្នុងនោះក្រុមហ៊ុនធានារ៉ាប់រងប្រភេទទូទៅចំនួន១៨ , ក្រុមហ៊ុនធានារ៉ាប់រងអាយុជីវិតចំនួន១៤ , ក្រុមហ៊ុនខ្នាតតូចធានារ៉ាប់រងខ្នាតតូចចំនួន៧ និងក្រុមហ៊ុនធានារ៉ាប់រងបន្តចំនួន១។ ក្រុមហ៊ុនទំាងអស់នេះ មានទ្រព្យសកម្មសរុបចំនួនប្រមាណជាង ១ពាន់លានដុល្លារ៕

អត្ថបទ ឈិត បូរ៉ាវី