កងទ័ពជើងទឹកឥណ្ឌា បានជួយសង្រ្គោះក្រុមនាវិកយ៉ាងហោច ៩នាក់ ក្នុងចំណោមនាវិក ១៦នាក់នៅលើនាវាដឹកប្រេងដោតទង់ជាតិកូម៉ូរ៉ូ ដែលបានលិចនៅជិតតំបន់ឆ្នេរប្រទេសអូម៉ង់ ខណៈមនុស្សម្នាក់ ត្រូវបានប្រទះឃើញស្លាប់ ។

នាវិកដែលត្រូវបានជួយសង្រ្គោះដោយនាវាចម្បាំង INS Teg របស់កងទ័ពជើងទឹកឥណ្ឌាមកទល់នឹងពេលនេះ រួមមានជនជាតិឥណ្ឌា ៨នាក់ និងជនជាតិស្រីលង្កាម្នាក់ ។ នេះបើយោងតាមការអះអាងរបស់អ្នកនាំពាក្យកងទ័ពជើងទឹកឥណ្ឌា ដែលបានចូលរួមប្រតិបត្តិការជួយសង្រ្គោះ និងរុករក ។

នាវាដឹកប្រេង Prestige Falcon ដែលមានបណ្តោយប្រវែង ១១៧ម៉ែត្រ បានធ្វើដំណើរទៅកាន់កំពង់ផែ Aden របស់យេម៉ែន ជាមួយនាវិកជនជាតិឥណ្ឌា ១៣នាក់ និងជនជាតិស្រីលង្កា ៣នាក់ ពេលដែលវាលិចនៅជិតកំពង់ផែឧស្សាហកម្ម Duqm របស់ប្រទេសអូម៉ង់ ។

ដោយឡែក មូលហេតុបណ្តាលឲ្យលិចនាវាមួយគ្រឿងនេះ ពុំត្រូវបានដឹងភ្លាមៗនោះទេ ។

សូមបញ្ជាក់ថា កំពង់ផែ Duqm ស្ថិតនៅតាមតំបន់ឆ្នេរភាគនិរតីប្រទេសអូម៉ង់ និងស្ថិតនៅជិតគម្រោងប្រេង និងឧស្ម័នសំខាន់របស់ពួកគេ ៕