នៅថ្ងៃព្រហស្បតិ៍នេះ តុលាការរុស្ស៊ី បានកាត់ទោសពលរដ្ឋសហរដ្ឋអាមេរិកលោក Michael Travis Leake ឲ្យជាប់ពន្ធនាការរយៈពេល ១៣ឆ្នាំ លើបទចោទប្រកាន់រត់ពន្ធគ្រឿងញៀន ។ នេះបើយោងតាមការអះអាងរបស់សេវាកម្មតុលាការក្រុងម៉ូស្គូនៅក្នុងសេចក្តីថ្លែងការណ៍ ។

សេវាកម្មតុលាការ និយាយថា លោក Leake ដែលជាតន្រ្តីករ និងជាអតីតទាហានឆ័ត្រយោងអាមេរិក ត្រូវបានរកឃើញថាមានទោសលក់គ្រឿងញៀនទ្រង់ទ្រាយធំ ។

ចំណែកឯជនជាប់ចោទម្នាក់ទៀតដែលជាពលរដ្ឋរុស្ស៊ី គឺអ្នកស្រី Veronika Grabanchuk ត្រូវបានកាត់ទោសឲ្យជាប់ពន្ធនាគាររយៈពេល ៨ឆ្នាំ ។

គេនៅពុំទាន់ដឹងច្បាស់នោះទេថាតើគាត់ឆ្លើយទទួលភាពមានទោសដោយរៀបណា ហើយទីភ្នាក់ងារព័ត៌មានរ៉យទ័រ ក៏ពុំអាចទាក់ទងជាមួយមេធាវីការពារក្តីរបស់គាត់បាននោះដែរ ។

សូមបញ្ជាក់ថា លោក Leake ស្ថិតនៅក្នុងចំណោមពលរដ្ឋអាមេរិករាប់សិបនាក់ ដែលបច្ចុប្បន្នស្ថិតក្នុងការឃុំឃាំងរបស់រុស្ស៊ី ។ 

ទីក្រុងវ៉ាស៊ីងតោន បានជំរុញឲ្យពលរដ្ឋអាមេរិក ចាកចេញពីរុស្ស៊ីជាបន្ទាន់ ដោយលើកឡើងពីការគំរាមកំហែងចាប់ខ្លួន និងការបៀតបៀន ស្របពេលដែលភាពតានតឹងរវាងប្រទេសទាំង ២ ឡើងកម្តៅខ្លាំងបំផុត ចាប់តាំងពីសង្រ្គាមត្រជាក់ ៕