នាយករដ្ឋមន្ត្រីថ្មីរបស់ចក្រភពអង់គ្លេស គឺលោក Keir Starmer នៅថ្ងៃព្រហស្បតិ៍ (ទី១៨ ខែកក្កដា) បានអំពាវនាវឲ្យមានកិច្ចសហប្រតិបត្តិការកាន់តែជិតស្និទ្ធ នៅក្នុងទ្វីបអឺរ៉ុប ដើម្បីជំរុញដល់ការគាំទ្រ សម្រាប់អ៊ុយក្រែន និងដោះស្រាយបញ្ហាបន្ទាន់បំផុតរបស់ទ្វីប ដែលមានដូចជាជនអន្តោប្រវេសន៍ខុសច្បាប់ បម្រែបម្រួលអាកាសធាតុ និងសន្តិសុខថាមពលជាដើម។

អំឡុងការបើកកិច្ចប្រជុំនៃសហគមន៍នយោបាយអឺរ៉ុប (EPC) ដែលមានជាង ៤០ប្រទេស ចូលរួមនៅឯវិមាន Blenheim លោក Starmer បានប្រឹងប្រែងឲ្យមានការកំណត់ឡើងវិញនៅក្នុងទំនាក់ទំនងក្រោយ Brexit (ការចាកចេញរបស់ចក្រភពអង់គ្លេសពីអឺរ៉ុប) ជាមួយសហភាពអឺរ៉ុប (EU)។

លោកបានផ្ដាច់ខ្លួនពីរដ្ឋាភិបាលអភិរក្សនិយម កាលពីមុន ដែលបានគម្រាមដកខ្លួនចេញពីសន្ធិសញ្ញាអន្តរជាតិស្តីពីសិទ្ធិមនុស្ស ដោយការធ្វើរបស់លោកបែបនេះ បានផ្តល់ជូនដល់បណ្ដាមេដឹកនាំអឺរ៉ុបផ្សេងទៀតនូវកេរ្តិ៍ឈ្មោះដ៏ស្អាតស្អំ។

កិច្ចប្រជុំរយៈពេល ១ថ្ងៃ ផ្តល់ឲ្យមេដឹកនាំថ្មីរបស់ចក្រភពអង់គ្លេសនូវឱកាសមួយផ្សេងទៀត ដើម្បីជំរុញឲ្យមានកិច្ចសហប្រតិបត្តិការការពារជាតិកាន់តែជិតស្និទ្ធ ជាពិសេសនៅមុនរយៈពេលនៃការបោះឆ្នោតដែលជ័យជម្នះអាចជារបស់លោក Donald Trump ដែលរូបលោករួមជាមួយមិត្តរួមតំណែងរបស់លោក គឺលោក J.D. Vance លើកឡើងថា អឺរ៉ុបត្រូវតែធ្វើអ្វីបន្ថែមទៀត ដើម្បីការពារសន្តិសុខរបស់ខ្លួន៕