លោក សួន សេរីរដ្ឋា ប្រធានវេទិកាសន្តិភាពកម្ពុជា បានលើកឡើងថា ភាពស្អិតរមួតរបស់កម្ពុជា និង​ចិន នាពេលបច្ចុប្បន្ននេះបានកើតឡើងស្ទើតែហួសកម្រិតទំនាក់ទំនងការទួតទៅទៀត ហើយ​ការ​ស្និទ្ធស្នាលនេះ បានធ្វើឲុ្យប្រទេសខ្លះមានភាពច្រណែន រហូតដល់បង្កើតរឿង និងលាបពណ៌​ផ្សេងៗ​ដល់កម្ពុជាជាដើមផងដែរ។

ក្នុងកិច្ចសម្ភាសន៍តុមូលជាមួយទូរទស្សន៍BTV ប្រធានវេទិកាសន្តិភាពកម្ពុជារូបនេះ បាននិយាយ ថា ទំនាក់ទំនងការទូតរវាងកម្ពុជា និងភាគីចិនគឺបានចាប់ផ្តើមតាំងពីយូរលង់ណាស់មកហើយ ពោល​គឺ​ចាប់តាំងពីសម័យអតីតព្រះករុណា ព្រះមហាវីរៈក្សត្រ ព្រះនរោត្តម សីហនុ ព្រះបរមរតន​កោដ្ឋ​មក​ម្លេះ ដោយទំនាក់ទំនងនេះបានរីកចម្រើនរហូតដល់យុទ្ធសាស្រ្តគ្រប់ជ្រុងជ្រោយ បាន​កសាង​​នូវ​មិត្តភាពដ៏ល្អ ដោយចាត់ទុកថា វាជាស្ពាន ជាផ្លូវ និងជាខ្សែរក្រវ៉ាត់មួយដ៏រឹមមាំ រវាង​រដ្ឋាភិបាល និងប្រជាជននៃប្រទេសទាំងពីរ (កម្ពុជា-ចិន)។

ទំនាក់ទំនងរវាងកម្ពុជា និងចិនអស់រយៈពេល៦៦ ឆ្នាំមកហើយ ហើយសម្រាប់ឆ្នាំ២០២៤នេះរដ្ឋា ភិបាលនៃប្រទេសទាំងពីរបានធ្វើការផ្លាស់ប្តូររវាងប្រជាជន និងប្រជាជននៃប្រទេសទាំងពីរនេះ លោក សួន សេរីរដ្ឋា បានលើកឡើងថា ចិនបានធ្វើអ្វីទៅតាមការសន្យារបស់ខ្លួនជាមួយកម្ពុជា ដោយ​ចិនបានទម្លាក់ក្រុមអ្នកវិនិយោគិនរបស់ខ្លួន ឲ្យមកធ្វើការសិក្សា​អំពី​សក្តានុពល​នៅ​កម្ពុជា​ដើម្បី​ដា​ក់ទុនវិនិយោគ ជាបន្តបន្ទាប់រហូតដល់សព្វថ្ងៃនេះ និងបន្ទាប់​មក​ចិន​បាន​ផ្តល់​ជា​ជំនួយ​ជា​ច្រើន​សម្រាប់ការកសាងនូវហេដ្ឋា រចនាសម្ព័ន្ធដល់កម្ពុជា និងពេលចុងក្រោយ​នេះ​ចិន​បាន​បើក​ចំហរ​នូវ​ទីផ្សាសម្រាប់ទិញនូវផលិតផល កសិកម្មរបស់កម្ពុជា ជាច្រើនផងដែរ​សម្រាប់​លក់​នៅ​ប្រទេស​ចិន​នោះ។

ជាមួយគ្នានោះដែរ លោក សួន សេរីរដ្ឋា ក៏បានលើកឡើងផងដែរថា ខណៈចិនគេជួយ និងឆ្លៀត ឱកាស​មកដាក់ទុនវិនិយោគ និងទេសចរណនៅកម្ពុជាហើយនោះ កម្ពុជាគប្បីត្រូវជួយគេវិញ ដោយ​ក្នុងនោះត្រូវមានសុច្ចរិតភាព និងគុណធម៌ចំពោះអ្នកវិនិយោគ និងអ្នកទេសចរណ៍​ទាំង​នោះ​ផង​ដែរ ខណៈគេ មកស្រុកយើងហើយគប្បីធ្វើការគោរព និងផ្តល់ភាពស្មោះត្រង់ដល់គេ កុំគិតតម្លៃជើងសារ(ពុករលួយ) ដែលធ្វើឲ្យពួកគេមានការថ្នាំងថ្នាក់ចំពោះការមកកម្ពុជា ដោយ​សារ​តែការចំណាយខុសខ្ទង់របស់ពួកគេ ហើយបែរធ្វើឲ្យគេ​សម្រេច​ចិត្ត​ទៅ​ប្រទេស​ជិត​ខាង​យើង​វិញដោ​យ​សារតែប្រទេសគេស្អាតស្អំ មិនគិតអំពី សេវានេះសេវានោះជាដើមនោះ៕ អត្ថបទ៖ បាន ចក់