ផ្លូវផ្គត់ផ្គង់ជំនួយដ៏សំខាន់មួយទៅកាន់តំបន់ ដាហ្វឺ (Darfur) របស់ប្រទេសស៊ូដង់ ដែលត្រូវបានអ្នកជំនាញចាត់ទុកថាមានហានិភ័យនៃគ្រោះទុរ្ភិក្ស ត្រូវបានកាត់ផ្តាច់ដោយសារតែភ្លៀងធ្លាក់ខ្លាំង នេះបើតាមមន្ត្រីកម្មវិធីស្បៀងអាហារពិភពលោក (WFP) បាននិយាយកាលពីថ្ងៃព្រហស្បតិ៍ (១៨ កក្កដា) ខណៈមន្ត្រីអង្គការសហប្រជាជាតិម្នាក់ទៀតបាននិយាយថា ជនភៀសខ្លួនត្រូវបង្ខំបរិភោគស្មៅជាអាហារ។

នាយកទីភ្នាក់ងារ WFP ប្រចាំស៊ូដង់ លោក អែដឌី រ៉ូវេ (Eddie Rowe) បានប្រាប់សារព័ត៌មានរ៉យទ័រថា ជំនួយរាប់ពាន់តោនត្រូវបានជាប់គាំងនៅច្រក ធីណា (Tina) នៅតាមព្រំដែនប្រទេសឆាដ ដែលជំរុញឱ្យស្ថាប័ននេះបើកការចរចាឡើងវិញជាមួយរដ្ឋាភិបាលដែលចូលបក្សសម្ព័ន្ធដោយកងទ័ព ដើម្បីបើកច្រកដែលឆ្លងកាត់បានគ្រប់ស្ថានភាពនៅចុងភាគខាងត្បូងឈ្មោះថា អាដ្រេ (Adre)។

ថ្លែងបន្ទាប់ពីកិច្ចចរចាមនុស្សធម៌ដោយប្រយោលដែលធ្វើឡើងនៅទីក្រុងហ្សឺណែវក្នុងសប្តាហ៍នេះ សមាជិកម្នាក់នៃគណៈប្រតិភូមកពីកងកម្លាំងគាំទ្ររហ័សយោធាប៉ារ៉ា (RSF) បាននិយាយថា ខ្លួនបានឈានដល់កិច្ចព្រមព្រៀងនៃការយោគយល់ជាមួយអង្គការសហប្រជាជាតិដើម្បីបើកច្រកផ្លូវជំនួសនោះ ប៉ុន្តែមិនមែនជាមួយកងទ័ពស៊ូដង់នោះទេ។

កម្មវិធីស្បៀងអាហារពិភពលោក (WFP) បានពណ៌នាស៊ូដង់ថាជាវិបត្តិអត់ឃ្លានដ៏ធំបំផុតរបស់ពិភពលោក ដោយតំបន់ Darfur ភាគខាងលិចប្រឈមនឹងហានិភ័យបំផុត ខណៈសង្គ្រាមស៊ីវិលរយៈពេល ១៥ខែរបស់ប្រទេសនេះបានជម្លៀសមនុស្សរាប់លាននាក់ និងបង្កឱ្យមានអំពើហិង្សាជនជាតិភាគតិចកើតឡើង៕