អាជ្ញាធរបានបិទទីតាំងបុរាណស្ថានទាំងអស់ក្នុងរដ្ឋធានីអាថែន រយៈពេលពីរថ្ងៃជាប់ៗគ្នាកាលពីថ្ងៃព្រហស្បតិ៍ (១៨ កក្កដា) ហើយបានរឹតបន្តឹងការងារក្រៅផ្ទះ ខណៈប្រទេសនេះបានស្ថិតនៅក្រោមរលកកម្ដៅទីពីរនៃរដូវក្តៅ ដែលបង្កជាបញ្ហាប្រឈមយ៉ាងធំសម្រាប់បុគ្គលិកដែលត្រូវធ្វើនៅខាងក្រៅដូចជាការដឹកជញ្ជូនជាដើម។

កាមេរ៉ាកម្ដៅបានកត់ត្រាសីតុណ្ហភាពប្រហែល ៧០អង្សាសេ នៅលើផ្ទៃផ្លូវថ្នល់ ប៉ុន្តែអ្នកធ្វើការផ្នែកដឹកជញ្ជូននៅតែបន្តការងាររបស់ខ្លួនជាចាំបាច់។ បុគ្គលិកដឹកជញ្ជូនអាហារម្នាក់បាននិយាយថា៖ «ការធ្វើដំណើរតាមម៉ូតូពិតជាពិបាកណាស់ព្រោះត្រូវពាក់មួកសុវត្ថិភាព ដែលធ្វើឱ្យថប់បែកញើស និងពិបាកធ្វើការយ៉ាងខ្លាំង»។

ដូចបណ្ដាប្រទេសជាច្រើននៅអឺរ៉ុបដែរ ក្រិកបានឃើញម្តងហើយម្តងទៀតនូវសីតុណ្ហភាពខ្ពស់រំខានដល់សកម្មភាពប្រចាំថ្ងៃចាប់តាំងពីខែមិថុនាមក ហើយចំហេះព្រៃរាប់រយកន្លែងបានផ្ទុះឡើងបន្ទាប់ពីរដូវរងាដែលមានអាកាសធាតុក្តៅបំផុតក្នុងកំណត់ត្រា ដោយអ្នកវិទ្យាសាស្ត្រផ្សារភ្ជាប់ទៅនឹងបម្រែបម្រួលអាកាសធាតុពិភពលោក។

រដ្ឋាភិបាលក្រិក បានបញ្ជាឱ្យអាជីវកម្មមួយចំនួនមិនអនុញ្ញាតឱ្យបុគ្គលិករបស់ពួកគេបំពេញកាតព្វកិច្ចនៅខាងក្រៅច្រើនពេកចាប់ពីពាក់កណ្តាលថ្ងៃត្រង់ រហូតដល់ម៉ោង ៥ ល្ងាច (ម៉ោងក្នុងស្រុក) ក្នុងសប្តាហ៍នេះ ដោយសារសីតុណ្ហភាពត្រូវបានគេរំពឹងថានឹងឡើងដល់ ៤២ អង្សាសេនៅក្នុងតំបន់មួយចំនួននៃប្រទេស៕