មន្ត្រីម្នាក់បាននិយាយថា នាយកដ្ឋានឧតុនិយមប្រទេសប៉ាគីស្ថាន បានជំរុញប្រជាជន និងអ្នកទេសចរ ឲ្យមានវិធានការប្រុងប្រយ័ត្នជាមុន ក្នុងពេលព្យាករណ៍ទឹកភ្លៀងធ្លាក់មូសុង។

នាយកដ្ឋានឧតុនិយមប្រទេសប៉ាគីស្ថាន បានណែនាំថា មនុស្សគ្រប់គ្នាគួរតែជៀសវាងការធ្វើដំណើរដែលមិនចាំបាច់ និងជៀសវាងតំបន់ដែលងាយទទួលរងបំណាក់ដី ហើយកុមារត្រូវរក្សានៅឱ្យឆ្ងាយពីតំបន់លិចទឹក ខ្សែភ្លើង និងបង្គោលភ្លើង ដោយបាននិយាយថា សុវត្ថិភាពអាយុជីវិត និងទ្រព្យសម្បត្តិរបស់ប្រជាជន គឺជាអាទិភាពខ្ពស់បំផុត។

មន្ត្រីឧតុនិយមនិយាយថា ខេត្តចំនួនបួននៅប្រទេសអាស៊ីខាងត្បូងមួយនេះ មានតំបន់ ហ្គីលជីត បាល់ទីស្តាន(Gilgit Baltistan) និង តំបន់កាស្មៀរ(Kashmir) ដែលគ្រប់គ្រងដោយប៉ាគីស្ថាន ត្រូវបានគេរំពឹងថានឹងមានភ្លៀងធ្លាក់ ខ្យល់ខ្លាំង និងផ្គររន្ទះ ដោយសារតែប្រព័ន្ធអាកាសធាតុ រហូតដល់ថ្ងៃទី២១ ខែកក្កដា ដែលអាចបណ្តាលឱ្យមានទឹកជំនន់។

គ្រប់ស្ថាប័ន ក្រសួងពាក់ព័ន្ធទាំងអស់ កំពុងសហការគ្នា ដើម្បីទប់ស្កាត់រាល់ឧបទ្ទវហេតុនានា ហើយនាយកដ្ឋានត្រូវបានណែនាំ ឲ្យមានការជូនដំណឹងដល់សហគមន៍មូលដ្ឋាន អ្នកទេសចរ និងអ្នកធ្វើដំណើរនៅតំបន់ដែលមានហានិភ័យខ្ពស់។

អាជ្ញាធរជាតិគ្រប់គ្រងគ្រោះមហន្តរាយ ក៏បានចេញសេចក្តីប្រកាសអាសន្ន និងការព្រមាន អំពីទឹកជំនន់ដ៏គំហុក និងការជន់លិចទីក្រុង នៅផ្នែកខ្លះរបស់ប្រទេស ដោយសារភ្លៀងមូសុង។

កាលពីថ្ងៃអាទិត្យ អាជ្ញាធរគ្រប់គ្រងគ្រោះមហន្តរាយខេត្ត Punjab បាននិយាយនៅក្នុងសេចក្តីថ្លែងការណ៍ថា មនុស្សយ៉ាងហោចណាស់២៤នាក់បានស្លាប់ និង៨០នាក់ផ្សេងទៀត បានរងរបួសនៅក្នុងឧបទ្ទវហេតុទាក់ទងនឹងភ្លៀងធ្លាក់ នៅក្នុងខេត្តភាគខាងកើត នៅខែនេះ។