ក្រសួងបរិស្ថាន បាននិយាយថា ប្រទេសកូរ៉េខាងជើង ហាក់ដូចជាបានចាប់ផ្តើមបញ្ចេញទឹកចេញពីផ្នែកខាងលើនៃទំនប់ នៅជិតព្រំដែនអន្តរកូរ៉េ កាលពីព្រឹកព្រលឹមថ្ងៃព្រហស្បតិ៍ ដោយពុំបានជូនដំណឹងជាមុនដល់កូរ៉េខាងត្បូងទេ។

ក្រសួងបរិស្ថាន បានអះអាងថា រូបភាពផ្កាយរណបដែលថតបាននៅម៉ោង ៣ ទៀបភ្លឺ បានបង្ហាញថា ទឹកខាងក្រោមនៃទំនប់ Hwanggang របស់កូរ៉េខាងជើង នៅលើទន្លេ Imjin បានរីកទទឹងកាន់តែធំ ការប្រែប្រួលមិនអាចមើលឃើញពីរូបថតដែលបានថតនៅម៉ោង ១០យប់ ថ្ងៃពុធនោះទេ។  

ក្រសួងបានបន្ថែមថា ទោះជាយ៉ាងណាក៏ដោយ បរិមាណទឹកដែលបានបញ្ចេញនោះ មិនត្រូវបានគេសន្មតថា មានសារៈសំខាន់ទេ។

កម្ពស់ទឹកនៃស្ពាន Pilseung ភាគខាងជើងរបស់កូរ៉េខាងត្បូង នៅទន្លេ Imjin បានកើនឡើងដល់ ២, ៨៨ ម៉ែត្រ គិតត្រឹមម៉ោង ៦:២០ ព្រឹក កើនឡើង ២,៤ ម៉ែត្រ បើធៀបនឹងម៉ោងដូចគ្នា កាលពីមួយថ្ងៃមុននេះ។

ការកើនឡើងកម្ពស់ទឹក គឺដោយសារតែឥទ្ធិពលនៃភ្លៀងធ្លាក់ខ្លាំង នៅជិតទន្លេ Imjin ក្រៅពីការបញ្ចេញទឹកពីទំនប់នោះ។

ប្រសិនបើកូរ៉េខាងជើងបញ្ចេញទឹក ៥០០តោនក្នុងមួយវិនាទីពីទំនប់ វាជាធម្មតាត្រូវចំណាយពេលប្រហែល ៩ម៉ោង ដើម្បីហូរទៅដល់ស្ពាន Pilseung។

កូរ៉េខាងជើង ត្រូវបានគេនិយាយថា មិនបានផ្តល់ការជូនដំណឹងជាមុនណាមួយអំពីការបញ្ចេញទឹកនេះ ដល់កូរ៉េខាងត្បូងទេ។

ក្រសួងបរិស្ថាន បានធ្វើបច្ចុប្បន្នភាពដល់យោធា និងរដ្ឋាភិបាលក្នុងតំបន់ អំពីស្ថានភាពនេះភ្លាមៗ បន្ទាប់ពីបញ្ជាក់ពីការបញ្ចេញទឹកទំនប់របស់កូរ៉េខាងជើង និងបានធ្វើឲ្យប្រព័ន្ធឆ្លើយតបគ្រាអាសន្នដំណើរការ។