ប្រធានាធិបតីអមេរិក លោក Joe Biden កំពុងស្ថិតនៅក្រោមការចោមរោមពីសមាជិកក្នុងគណបក្សរបស់លោក ខណៈដែលអ្នកប្រជាធិបតេយ្យកាន់តែច្រើនឡើងៗ ទាំងឯកជន និងសាធារណៈ ជំរុញឲ្យលោកបញ្ចប់ការប៉ុនប៉ុង ដើម្បីជាប់ឆ្នោតឡើងវិញ បន្ទាប់ពីមាននូវលទ្ធផលមិនល្អ អំឡុងពេលជជែកដេញទល់នឹងគូបដិបក្ខ លោក Donald Trump។

កិច្ចប្រឹងប្រែងរបស់លោក Biden ក្នុងការពង្រឹងដល់ទំនុកចិត្តលើបេក្ខភាពរបស់លោក មិនអាចផ្សះផ្សាការបែកបាក់ រវាងលោក និងគណបក្សរបស់លោកដែលកំពុងកើនឡើងបានឡើយ។ ហើយបើទោះជារហូតមកដល់ពេលនេះ លោកបានច្រានចោលការអំពាវនាវឲ្យលោកដកខ្លួនក៏ដោយ ក៏លោក Biden បាននិយាយកាលពីថ្ងៃអង្គារ (ទី១៦ ខែកក្កដា) ថា ប្រសិនបើមាន «បញ្ហាសុខភាព» លេចឡើង នោះអាចបង្ខំឲ្យលោកត្រូវពិចារណាឡើងវិញនូវការសម្រេចចិត្តរបស់លោក ក្នុងការបន្តការប្រកួតប្រជែង។

ប្រកដណាស់ នៅដំណាក់កាលនេះ មធ្យោបាយតែ ១គត់ ដើម្បីជំនួសលោក Biden នៅក្នុងតំណែងបេក្ខជនទី១ របស់គណបក្សប្រជាធិបតេយ្យ អំឡុងពេលធ្វើយុទ្ធនាការនេះ គឺលុះត្រាណាតែរូបលោកផ្ទាល់យល់ព្រមបោះបង់ដោយស្ម័គ្រចិត្ត ឬបើមិនដូច្នោះទេ លុះត្រាតែលោកទទួលមរណភាព ឬមាន «ពិការភាព»។

ប្រសិនបើលោក Biden បញ្ចប់យុទ្ធនាការរបស់លោក មុនការបោះឆ្នោតចាប់ផ្តើម គណៈប្រតិភូដែលត្រូវបានកំណត់ អាចបោះឆ្នោតជ្រើសរើសបេក្ខជនថ្មី។ យោងតាមច្បាប់របស់ DNC (សន្និបាតគណបក្សប្រជាធិបតេយ្យ) ប្រសិនបើគ្មានបេក្ខជនណាឈ្នះសំឡេងភាគច្រើននៅក្នុងបោះឆ្នោតដំបូងនោះ «គណៈប្រតិភូជាន់ខ្ពស់» ច្រើនជាង ៧០០នាក់ អាចចូលរួមក្នុងការបោះឆ្នោតបន្តបន្ទាប់។ បន្ទាប់មក ការបោះឆ្នោតនឹងបន្តរហូតដល់បេក្ខជនណាម្នាក់ទទួលបានសំឡេងភាគច្រើនពីគណៈប្រតិភូ។

សម្រាប់ពេលនេះ ក្នុងពេលមានសម្ពាធកាន់តែខ្លាំងឡើងលើលោក Biden ឲ្យចាកចេញពីការប្រកួតប្រជែងនោះ ការចាប់អារម្មណ៍កាន់តែខ្លាំងឡើងៗ បានត្របាញ់ឆ្ពោះទៅអនុប្រធានាធិបតី លោកស្រី Kamala Harris ដែលបណ្ឌិត និងអ្នកជំនាញជាច្រើន ចាត់ទុកថា ជាជម្រើសដែលទំនងបំផុត ក្នុងការមកជំនួសរូបលោក៕