អាជ្ញាធរដែនសមុទ្រនិងកំពង់ផែ បាននិយាយនៅថ្ងៃសុក្រនេះថា ប្រទេសសិង្ហបុរី បានបញ្ជូននាវាកងទ័ពជើងទឹក និងឧទ្ធម្ភាគចក្រកងទ័ពអាកាស ទៅជួយសង្គ្រោះនាវាដឹកប្រេងចំនួនពីរគ្រឿង ដែលបានឆាបឆេះនៅក្នុងតំបន់រុករក និងជួយសង្គ្រោះ ដែនសមុទ្ររបស់ប្រទេស។

អាជ្ញាធរដែនសមុទ្រ ត្រូវបានគេផ្តល់ដំណឹងអំពីអគ្គិភ័យឆេះនាវាដឹកប្រេងដោតទង់ជាតិសិង្ហបុរីមួយគ្រឿង និងនាវាដឹកប្រេងដោតទង់ជាតិប្រទេសកោះសៅតូម៉េ និងប្រាំងស៊ីប(Sao Tome and Principe) មួយគ្រឿង មានចម្ងាយ ៥៥ គីឡូម៉ែត្រភាគឦសានកោះ Pedra Branca។ 

អាជ្ញាធរដែនសមុទ្រ បានស្នើសុំនាវាដែលឆ្លងកាត់ ដើម្បីជួយស្វែងរក និងសង្គ្រោះក្រុមនាវិក។

នៅក្នុងសេចក្តីថ្លែងការណ៍មួយលើបណ្តាញផ្សព្វផ្សាយសង្គម កងទ័ពជើងទឹកប្រទេសសិង្ហបុរី បាននិយាយថា នាវាចម្បាំង RSS Supreme បានជួយសង្គ្រោះក្រុមនាវិក និងបានផ្តល់ជំនួយផ្នែកវេជ្ជសាស្រ្តដល់ពួកគេ។

រូបភាព ដែលបានចេញផ្សាយដោយកងទ័ពអាកាសសិង្ហបុរី បានបង្ហាញនាវិកដែលត្រូវបានជួយសង្គ្រោះ ត្រូវបានគេនាំចេញពីឧទ្ធម្ភាគចក្រ មុនពេលបញ្ជូនចូលទៅកាន់មន្ទីរពេទ្យ។

ប្រទេសសិង្ហបុរី គឺជាមជ្ឈមណ្ឌលពាណិជ្ជកម្មប្រេងរបស់អាស៊ី និងជាកំពង់ផែធំបំផុតមួយរបស់ពិភពលោក ហើយតំបន់ជុំវិញដែនទឹក គឺជាផ្លូវទឹកពាណិជ្ជកម្មដ៏សំខាន់រវាងអាស៊ី និងអឺរ៉ុប និងមជ្ឈិមបូព៌ា។