ក្រុមហ៊ុនអាកាសចរណ៍ធំៗរបស់សហរដ្ឋអាមេរិក បានប្រកាសផ្អាកការហោះហើររបស់ខ្លួន នៅថ្ងៃសុក្រ (ទី១៩ ខែកក្កដា) នេះ ដោយលើកឡើងពីបញ្ហាទំនាក់ទំនង ខណៈដែលក្រុមហ៊ុនអាកាសចរណ៍ផ្សេងទៀត ក្រុមហ៊ុនប្រព័ន្ធផ្សព្វផ្សាយ ធនាគារ និងក្រុមហ៊ុនទូរគមនាគមន៍ នៅជុំវិញពិភពលោក ក៏បានរាយការណ៍ថា ការដាច់ប្រព័ន្ធអ៊ិនធឺណិត ឬ IT កំពុងរំខានដល់ប្រតិបត្តិការរបស់ពួកគេ។

ក្រុមហ៊ុនអាកាសចរណ៍ American Airlines, Delta Airlines, United Airlines និង Allegiant Air បានផ្អាកការហោះហើរតិចជាង ១ម៉ោង បន្ទាប់ពីក្រុមហ៊ុន Microsoft បានប្រាប់ថា ខ្លួនបានដោះស្រាយការគាំងសេវាក្លោដរបស់ខ្លួន ដែលបានប៉ះពាល់ដល់ក្រុមហ៊ុនអាកាសចរណ៍តម្លៃទាបជាច្រើន។ តែយ៉ាងណាក្ដី ភ្លាមៗ គេនៅមិនទាន់ច្បាស់ទេថា តើការប្រកាសមិនឲ្យមានការហោះហើរ គឺទាក់ទងទៅនឹងការគាំងប្រព័ន្ធ IT របស់ក្រុមហ៊ុន Microsoft នៅមុននេះដែរ ឬយ៉ាងណា។

នៅប្រទេសអូស្ត្រាលី ប្រព័ន្ធផ្សព្វផ្សាយ ធនាគារ និងក្រុមហ៊ុនទូរគមនាគមន៍ បានទទួលរងការរំខាន ដែលរដ្ឋាភិបាល បាននិយាយថា ហាក់ដូចជាមានទំនាក់ទំនងទៅនឹងបញ្ហាមួយ នៅឯក្រុមហ៊ុនសន្តិសុខអ៊ីនធឺណិតពិភពលោក Crowdstrike។ 

នាថ្ងៃទី១៩ ខែកក្កដា នៅពេលដែលសារព័ត៌មាន Reuters ទាក់ទងផ្នែកជំនួយបច្ចេកទេសរបស់ខ្លួន ក្រុមហ៊ុន Crowdstrike បានប្រាប់ថា ខ្លួនដឹងពីរបាយការណ៍នៃការដាច់លើប្រព័ន្ធប្រតិបត្តិការ Windows របស់ក្រុមហ៊ុន Microsoft ទាក់ទងនឹងឧបករណ៍ចាប់សញ្ញា Falcon ដោយមិនបាននិយាយអំពីប្រទេសអូស្ត្រាលីនោះឡើយ៕