រដ្ឋមន្ត្រីការពារជាតិអាល្លឺម៉ង់ លោក Boris Pistorius បាននិយាយកាលពីថ្ងៃព្រហស្បតិ៍ថា ការសម្រេចចិត្តដាក់ពង្រាយមីស៊ីលរយៈចម្ងាយឆ្ងាយរបស់អាមេរិក នៅក្នុងប្រទេសអាល្លឺម៉ង់ ចាប់ពីឆ្នាំ ២០២៦ ជាការឆ្លើយតបទៅនឹងការដាក់ពង្រាយប្រព័ន្ធមីស៊ីលតាក់ទិច Iskander នៅក្នុងតំបន់ Kaliningrad របស់ប្រទេសរុស្ស៊ី។

លោកបានអះអាងនៅក្នុងបទសម្ភាសន៍មួយជាមួយសារព័ត៌មាន Tageblatt ដែលមានមូលដ្ឋាននៅទីក្រុងលុចសំបួថា៖«អ្វីដែលសហរដ្ឋអាមេរិក នឹងធ្វើនៅក្នុងប្រទេសអាល្លឺម៉ង់ ចាប់ពីឆ្នាំ ២០២៦ គឺគ្មានអ្វីក្រៅពីការឆ្លើយតបទៅនឹងការគំរាមកំហែងរបស់រុស្ស៊ីដែលបង្កឡើងដោយការដាក់ពង្រាយមីស៊ីល Iskander នៅតំបន់ Kaliningrad»។

លោក Pistorius បាននិយាយថា ប្រទេសអាល្លឺម៉ង់ «មិនបានប្រឈមមុខនឹងបញ្ហានៃការដាក់ពង្រាយអាវុធអស់រយៈពេល ៣៥ ឆ្នាំមកហើយ»។ តាមគំនិតរបស់លោក វត្តមានរបស់មីស៊ីលអាមេរិកក្នុងប្រទេសអាល្លឺម៉ង់ អាចត្រូវបានការពារ ដោយតម្រូវការសម្រាប់ការទប់ស្កាត់នុយក្លេអ៊ែរ។

" លោកបានបន្ថែមថា៖«នៅពេលដែលមនុស្សគ្រប់គ្នាដឹងថា អាល្លឺម៉ង់ និងណាតូ មានសមត្ថភាពការពារខ្លួនដោយជោគជ័យ នេះនឹងកាត់បន្ថយលទ្ធភាពនៃការវាយប្រហារមកលើពួកយើង»។

ការិយាល័យសារព័ត៌មានរបស់សេតវិមានអាមេរិក បានប្រកាសកាលពីថ្ងៃទី ១០ ខែកក្កដាថា សហរដ្ឋអា  មេរិក នឹងចាប់ផ្តើមដាក់ពង្រាយសមត្ថភាពរយៈចម្ងាយឆ្ងាយនៅក្នុងប្រទេសអាល្លឺម៉ង់ ក្នុងឆ្នាំ ២០២៦ ជាមួយនឹងរយៈចម្ងាយឆ្ងាយគួរឲ្យកត់សម្គាល់ជាងមីស៊ីលបាញ់នៅលើដីនៅអឺរ៉ុប នាពេលបច្ចុប្បន្ន។ ឯកអគ្គរដ្ឋទូតរុស្ស៊ីប្រចាំនៅទីក្រុងវ៉ាស៊ីនតោន លោក Anatoly Antonov បាននិយាយថា ផែនការរបស់សហរដ្ឋអាមេរិក បានបង្កើនលទ្ធភាពនៃការប្រណាំងប្រជែងមីស៊ីល ហើយអាចនាំឲ្យមានការកើនឡើងភាពតានតឹង ដែលមិនអាចគ្រប់គ្រងបាន។