ប្រធានសន្តិសុខរបស់លោកស្រី Maria Corina Machado ដែលជាមេដឹកនាំប្រឆាំងនៅប្រទេសវេណេហ្ស៊ុយអេឡា ត្រូវបានដោះលែងពីពន្ធនាគារហើយ ពោលគឺមានរយៈពេលមួយថ្ងៃ បន្ទាប់ពីរូបលោកត្រូវបានចាប់ខ្លួនដោយចោទប្រកាន់ពីអំពើហិង្សាយេនឌ័រ។

ក្រោយមានការដោះលែងនេះ តាមរយៈការបង្ហោះ នៅលើបណ្ដាញសង្គម X កាលពីថ្ងៃព្រហស្បតិ៍ (ទី១៨ ខែកក្កដា) លោកស្រី Machado បានឲ្យដឹងថា ប្រធានសន្តិសុខ លោក Milciades Avila ត្រូវបានកំណត់ឲ្យបង្ហាញខ្លួននៅតុលាការរៀងរាល់ ៣០ថ្ងៃម្តង ដោយលោកស្រីបានអរគុណដល់អ្នកគាំទ្រទាំងអស់ ដែលបានផ្ដល់កម្លាំងចិត្ត និងការរួមចំណែករបស់ពួកគេ «ក្នុងការជួយឲ្យទទួលបានយុត្តិធម៌នេះ»។

គួរបញ្ជាក់ថា លោក Avila ត្រូវបានឃុំខ្លួន កាលព្រឹកថ្ងៃពុធក្រោមបទចោទប្រកាន់ពីការប្រព្រឹត្តិហិង្សាលើស្ត្រីមួយក្រុម ដែលត្រូវបានរាយការណ៍ថា បានព្យាយាមវាយប្រហារលើលោកស្រី Machado រួមជាមួយនឹងបេក្ខជនរបស់ក្រុមប្រឆាំងចម្រុះ គឺលោក Edmundo Gonzalez នៅឯអាហារដ្ឋានមួយកន្លែង ក្នុងរដ្ឋ Aragua កាលពីចុងសប្តាហ៍កន្លងទៅ។

ការចាប់ខ្លួនលោក បានកើតមានឡើង ក្នុងរយៈពេលមិនដល់ ២សប្តាហ៍ផង នៅមុនការបោះឆ្នោតថ្ងៃទី២៨ ខែកក្កដា ដែលនៅក្នុងការស្ទង់មតិ លោក Gonzalez កំពុងនាំមុខលើប្រធានាធិបតី លោក Nicolas Maduro ដែលកំពុងស្វែងរកអាណត្តិទី៣។

គណបក្សប្រឆាំងរបស់ប្រទេសវេណេហ្ស៊ុយអេឡា បានបរិហារការចាប់ខ្លួននេះ និងវិមានការផ្សេងទៀតរបស់អាជ្ញាធរ ដែលពួកគេនិយាយថា មានបំណងធ្វើឲ្យប៉ះពាល់ដល់យុទ្ធនាការបោះឆ្នោតរបស់ខ្លួន និងរារាំងការបោះឆ្នោតដោយយុត្តិធម៌។ តែរដ្ឋាភិបាលបដិសេធការចោទប្រកាន់នេះ៕