កំពង់ចាម ៖ ផ្លូវជនបទជាច្រើនខ្សែនៅក្នុងស្រុកចំការលើ ស្ថិតក្រោមក្របខណ្ឌក្រសួងអភិវឌ្ឍន៍ជនបទ បានផ្តល់អត្ថប្រយោជនដល់ប្រជាជន រស់នៅមូលដ្ឋាន សម្រាប់ធ្វើដំណើរ ការដឹកជញ្ជូនកសិផលផ្សេងៗ និងសម្រួលដល់ការធ្វើអាជីវកម្មផ្សេងៗ ជាពិសេសការរកស៊ីទទួល ទានប្រចាំថ្ងៃរបស់ប្រជាពលរដ្ឋនៅតាមមូលដ្ឋាន។

​ឯកឧត្តម សាន វិសាល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី ១៩ ខែ កក្កដា ឆ្នាំ ២០២៤ នេះ បានដឹកនាំគណៈកម្មាធិការអន្តរក្រសួង ចុះត្រួតពិនិត្យ វាយតម្លៃប្រគល់-ទទួលបញ្ចប់ជាស្ថាពរ រយៈពេលធានាសុពលភាពការងារស្ថាបនាផ្លូវក្រាលដីល្បាយក្រួសចំនួន ២ ខ្សែ ប្រវែងសរុប ៥ ៥០០ ម៉ែត្រ ទទឹង ៨ ម៉ែត្រ ស្ថាបនាលូ មូលមុខមួយចំនួន ៤កន្លែង និងផ្លាកឈ្មោះផ្លូវចំនួន ២កន្លែង ស្ថិតនៅភូមិ ៣៤ ឃុំតាអុង ស្រុកចំការលើ ខេត្តកំពង់ចាម ដោយផ្លូវនេះ មានសារៈសំខាន់ណាស់ ដោយបានកំពុងជួយសម្រួលដល់ការធ្វើដំណើររបស់ប្រជាពលរដ្ឋ ជាពិសេសផ្តល់អត្ថប្រយោជន៍ដល់ការ ដឹកជញ្ជូនរបស់កសិកផល, ពោលគឺការអភិវឌ្ឍន៍ហេដ្ឋារចនាសម្ព័ន្ធនៅតាមមូលដ្ឋាននេះ នៅក្នុងអាណត្តិនីមួយៗ ត្រូវបានរាជរដ្ឋាភិ បាលវិនិយោគជាច្រើនសន្ធឹកសន្ធាប់ ព្រោះផ្លូវគឺជាសរសៃរឈាមនៃសេដ្ឋកិច្ចជាតិ។

ឯកឧត្តម បន្តថា ជាក់ស្តែងផ្លូវដែលស្ថាបនាដោយ នាយកដ្ឋានស្ថាបនា និងវិស្វកម្ម នៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ ខាងលើនេះ ពិតជាផ្តល់អត្ថប្រយោជន៍យ៉ាងខ្លាំង ក្រៅពីការធ្វើដំណើរ និងការដឹកជញ្ជូនកសិផលផ្សេងៗ ផ្លូវមួយនេះ ក៏ជួយសម្រួលដល់ការធ្វើអាជីវកម្មផ្សេងៗ ជាពិសេសការរកស៊ីទទួលទានប្រចាំថ្ងៃរបស់ប្រជាពលរដ្ឋនៅតាមមូលដ្ឋាន ដើម្បីជំរុញជួយ លើកកម្ពស់ជីវភាពរបស់ពួកគាត់ឲ្យកាន់តែរីកចម្រើន។

បន្ទាប់ពីចុះពិនិត្យផ្លូវខាងលើរួច, ឯកឧត្តម សាន វិសាល និងគណៈកម្មាធិការអន្តរក្រសួង ចុះជួបសំណេះសំណាលជាមួយ អាជ្ញាធរមូលដ្ឋាន និងប្រជាពលរដ្ឋនៅមូលដ្ឋានខាងលើ ដោយក្នុងពិធីនោះឯកឧត្តមរដ្ឋលេខាធិការ បានផ្តាំផ្ញើដល់អាជ្ញាធរមូលដ្ឋាន និងប្រជាពលរដ្ឋទាំងអស់ ចូលរួមថែទាំផ្លូវនិងលូក្នុងមូលដ្ឋានរបស់ពួកគាត់ សម្រាប់ជាប្រយោជន៍ប្រើប្រាស់យូរអង្វែង ។ ក្នុងពិធី សំណេះសំណាលនេះដែរ ឯកឧត្តម ក៏បាននាំយកអំណោយជាក្រម៉ាដ៏ថ្លៃថ្លា របស់ឯកឧត្តមរដ្ឋមន្ត្រី ចែកជូនប្រជាពលរដ្ឋ ជាច្រើននាក់ ដោយម្នាក់ៗទទួលបានក្រម៉ាចំនួន១ ផងដែរ៕

អត្ថបទ៖ សុន រ៉ាឌី