ប្រព័ន្ធផ្សព្វផ្សាយរដ្ឋ នៅថ្ងៃសុក្រ (ទី១៩ ខែកក្កដា) នេះ បានរាយការណ៍ថា ប្រមុខបក្សកុម្មុយនីស្តវៀតណាម លោក Nguyen Phu Trong បានទទួលមរណភាពហើយ ក្នុងវ័យ ៨០ឆ្នាំ បន្ទាប់ពីកាន់តំណែងដ៏មានឥទ្ធិពលបំផុតរបស់ប្រទេសអស់រយៈពេល ១៣ឆ្នាំ។

ដោយដកស្រង់ព័ត៌មានពីក្រុមគ្រូពេទ្យរបស់លោក Trong ប្រព័ន្ធផ្សព្វផ្សាយរដ្ឋ បានឲ្យដឹងថា លោកបានលាចាកលោកនេះ នៅរសៀលថ្ងៃសុក្រនេះ «បន្ទាប់ពីមានជំងឺមួយរយៈ»។ ប្រព័ន្ធផ្សព្វផ្សាយនោះ បានរាយការណ៍ថា លោកបានទទួលមរណភាព ដោយសារតែមានវ័យចំណាស់ និងជំងឺធ្ងន់ធ្ងរ តែមិនបានបញ្ជាក់អ្វីលម្អិតបន្ថែមឡើយ។

កាលពីថ្ងៃព្រហស្បតិ៍ (ទី១៨ ខែកក្កដា) ប្រធានាធិបតីវៀតណាម លោក To Lam បានចូលកាន់តំណែងជំនួសលោក Trong នៅពេលដែលបក្សបានប្រកាសថា មេដឹកនាំវ័យចំណាស់របស់ខ្លួន ត្រូវការផ្តោតលើការព្យាបាលផ្នែកវេជ្ជសាស្រ្ត។

គួរបញ្ជាក់ថា ទោះបីជាវៀតណាម ជាផ្លូវការមិនមានមេដឹកនាំកំពូលក៏ដោយ ប៉ុន្តែលោក Trong ដែលទទួលបានការអប់រំពីសហភាពសូវៀត ក្នុងនាមជាអគ្គលេខាធិការបក្ស គឺជាឥស្សរជនដ៏មានឥទ្ធិពលបំផុត នៅក្នុងប្រទេសដែលគ្រប់គ្រងដោយលទ្ធិកុម្មុយនីស្តមួយនេះ ហើយបានកាន់តំណែងនេះ ចាប់តាំងពីឆ្នាំ២០១១ មក។

នៅឆ្នាំ២០២១ លោក Trong ទទួលបានអាណត្តិទី៣ បន្ទាប់ពីច្បាប់កំណត់អ្នកកាន់តំណែងប្រមុខបក្សមកត្រឹម ២អាណត្តិ ត្រូវបានលុបចោល ដោយបង្ហាញពីភាពខ្លាំង និងឥទ្ធិពលនយោបាយដ៏សំខាន់របស់លោក នៅក្នុងគណបក្សដែលបានគ្រប់គ្រងវៀតណាមអស់រយៈពេលជិតកន្លះសតវត្សរ៍។

បក្សនឹងត្រូវសម្រេចថា តើលោក Lam នឹងធ្វើជាអគ្គលេខាបក្សស្តីទីរហូតដល់អាណត្តិបច្ចុប្បន្ន សម្រាប់តំណែងនេះ ផុតកំណត់ បន្ទាប់ពីសមាជនាពេលបន្ទាប់ នៅឆ្នាំ២០២៦ ឬថា តើបក្សនឹងត្រូវជ្រើសរើសបេក្ខជនថ្មីជាមុន ពីក្នុងជួររបស់បក្ស ឬយ៉ាងណា៕