លោកស្រី Begona Gomez ដែលជាភរិយារបស់នាយករដ្ឋមន្ត្រីអេស្ប៉ាញ លោក Pedro Sanchez បានបង្ហាញខ្លួននៅចំពោះមុខចៅក្រម នៅថ្ងៃសុក្រ (ទី១៩ ខែកក្កដា) នេះ ប៉ុន្តែបានបដិសេធមិនឆ្លើយតបសំណួរ ពាក់ព័ន្ធនឹងអំពើពុករលួយ និងការចោទប្រកាន់ពីការប្រើឥទ្ធិពលលើជំនួញ ពោលគឺជាសំណុំរឿងដែលនាំឲ្យស្វាមីរបស់លោកស្រីពិចារណាលាលែងពីតំណែង កាលពីខែមេសា។

សវនាការនៅទីក្រុងម៉ាឌ្រីដ នាថ្ងៃសុក្រនេះ គឺជាផ្នែកមួយនៃការស៊ើបអង្កេតបឋម ជុំវិញថា តើលោកស្រី Gomez បានប្រើតួនាទីរបស់ខ្លួន ក្នុងនាមជាភរិយានារបស់យករដ្ឋមន្ត្រីដែរ ឬទេ ដើម្បីទទួលបានការឧបត្ថម្ភសម្រាប់វគ្គសិក្សាថ្នាក់បរិញ្ញាបត្រជាន់ខ្ពស់ នៅសាកលវិទ្យាល័យដែលលោកស្រីបានគ្រប់គ្រង។

បន្ទាប់ពីលោកស្រី Gomez បានចាកចេញពីសាលាក្តី មេធាវីរបស់លោកស្រី និងជាអតីតរដ្ឋមន្ត្រីក្រសួងមហាផ្ទៃ លោក Antonio Camacho បានប្រាប់អ្នកសារព័ត៌មានថា៖ «ជំហររបស់យើង គឺថា ដំណើរការនេះ គឺគ្មានមូលដ្ឋានពេញលេញនោះទេ។ កូនក្តីរបស់ខ្ញុំ មិនបានផ្តល់សក្ខីកម្មទេ ដែលនេះមិនមែនដោយសារតែគាត់មានរឿងដែលត្រូវលាក់បាំងនោះឡើយ ប៉ុន្តែដោយសារតែមេធាវីរបស់គាត់ បានណែនាំឲ្យធ្វើដូច្នេះ»។

លោកស្រី Gomez ត្រូវបានអនុញ្ញាតឲ្យចូល និងចាកចេញពីតុលាការ តាមចំណតរថយន្តក្រោមដី ដើម្បីគេចពីអ្នកសារព័ត៌មានរាប់សិបនាក់ នៅខាងក្រៅ៕