ប្រធានាធិបតីសហរដ្ឋអាមេរិក លោក Joe Biden កាលពីថ្ងៃសុក្រ បានប្តេជ្ញាថា នឹងបន្តយុទ្ធនាការរបស់លោកសម្រាប់ការបោះឆ្នោតថ្មី ទោះបីជាសមាជិកគណបក្សប្រជាធិបតេយ្យជាច្រើន នៅក្នុងសភាបានជំរុញឱ្យលោកបញ្ចប់យុទ្ធនាការដ៏លំបាករបស់លោក ដោយព្រួយបារម្ភថា វាអាចធ្វើឱ្យគណបក្សខាតបង់ច្រើន នៅក្នុងការបោះឆ្នោតនៅថ្ងៃទី៥ ខែវិច្ឆិកា។

សមាជិកសភាគណបក្សប្រជាធិបតេយ្យម្នាក់ក្នុងចំណោម១០នាក់ បច្ចុប្បនេះ បានអំពាវនាវជាសាធារណៈឲ្យអ្នកកាន់តំណែងដែលមានអាយុ៨១ឆ្នាំរូបនេះ ដែលកំពុងស្នាក់នៅក្នុងលំនៅឋានដោយឆ្លងជំងឺ COVID ឱ្យបោះបង់ចោលយុទ្ធនាការ បន្ទាប់ពីការជជែកដេញដោលមិនបានល្អ កាលពីខែមិថុនា ទល់នឹងលោក Donald Trump ដែលបានចោទជាសំណួរជាច្រើន អំពីសមត្ថភាពរបស់លោក Biden ដើម្បីទទួលបានជ័យជម្នះ ឬបំពេញភារកិច្ចរបស់លោកសម្រាប់រយៈពេលបួនឆ្នាំទៀត។

លោក Biden នៅតែរឹងរូស ដោយនិយាយថា លោកនឹងបន្តយុទ្ធនាការក្នុងពេលឆាប់ៗនេះ។

លោកបាននិយាយនៅក្នុងសេចក្តីថ្លែងការណ៍ថា លោកទន្ទឹងរង់ចាំការត្រលប់ទៅរកយុទ្ធនាការវិញ នៅសប្តាហ៍ក្រោយ ដើម្បីបន្តបង្ហាញពីការគំរាមកំហែងនៃរបៀបវារៈនៃគម្រោងឆ្នាំ២០២៥ របស់លោក Donald Trump ។

ការបែងចែកក្នុងចំណោមសមាជិកគណបក្សប្រជាធិបតេយ្យ បានផ្ទុយស្រឡះពីទិដ្ឋភាពដែលបានកើតឡើងនៅសប្តាហ៍នេះ នៅក្នុងសន្និបាតជាតិគណបក្សសាធារណៈរដ្ឋក្នុងទីក្រុង Milwaukee ជាកន្លែងដែលអតីតគូប្រជែងរបស់គណបក្ស បានរួបរួមគ្នានៅជុំវិញលោក Trump ដែលបានទទួលយកការតែងតាំងពីគណបក្សសាធារណរដ្ឋ នៅក្នុងសុន្ទរកថាដ៏រំជើបរំជួល។

រហូតមកដល់ពេលនេះ សមាជិកគណបក្សប្រជាធិបតេយ្យចំនួន៣២រូប ក្នុងចំណោម២៦៤រូប នៅក្នុងសភា បានអំពាវនាវដោយបើកចំហឱ្យលោក Biden បញ្ចប់យុទ្ធនាការរបស់លោក ខណៈមេដឹកនាំជាន់ខ្ពស់គណបក្សប្រជាធិបតេយ្យផ្សេងទៀត បានជំរុញលោក នៅពីក្រោយឆាក ដើម្បីឲ្យលោកធ្វើដូច្នេះ។ គណបក្សប្រជាធិបតេយ្យ មានការព្រួយបារម្ភកាន់តែខ្លាំងឡើងអំពីការបោះឆ្នោតរបស់គណបក្សសាធារណរដ្ឋ នៅក្នុងការបោះឆ្នោតថ្ងៃទី៥ ខែវិច្ឆិកា ដែលអាចធ្វើឱ្យលោក Trump និងសម្ព័ន្ធមិត្តរបស់លោក មិនត្រឹមតែទទួលបន្ទុកនៅសេតវិមានប៉ុណ្ណោះទេ ប៉ុន្តែក៏ទទួលបានសំឡេងភាគច្រើន នៅក្នុងសភាទាំងពីរ ផងដែរ។