តុលាការកំពូលរបស់អង្គការសហប្រជាជាតិ បាននិយាយកាលពីថ្ងៃសុក្រថា ការចូលកាន់កាប់ដែនដីប៉ាឡេស្ទីន និងការតាំងលំនៅរបស់អ៊ីស្រាអែល នៅទីនោះគឺខុសច្បាប់ ហើយគួរតែត្រូវដកខ្លួនចេញឱ្យបានឆាប់តាមដែលអាចធ្វើទៅបាន នៅក្នុងការរកឃើញដ៏ច្បាស់លាស់បំផុតរបស់ខ្លួន រហូតមកដល់បច្ចុប្បន្ន ស្តីពីជម្លោះរវាងអ៊ីស្រាអែល និងប៉ាឡេស្ទីន។ មតិយោបល់របស់អង្គចៅក្រម នៅតុលាការយុត្តិធម៌អន្តរជាតិ (ICJ) ដែលគេស្គាល់ថាជាតុលាការពិភពលោក មានទម្ងន់នៅក្រោមច្បាប់អន្តរជាតិ ហើយអាចនឹងធ្វើឱ្យការគាំទ្រដល់អ៊ីស្រាអែល ចុះខ្សោយ។

ប្រធានតុលាការ លោក Nawaf Salam បាននិយាយដោយបានអានការរកឃើញរបស់គណៈកម្មការចៅក្រុមចំនួន១៥រូបថា ការតាំងទីលំនៅរបស់អ៊ីស្រាអែល នៅតំបន់ West Bank និងទីក្រុងហ្សេរុយសាឡឹមខាងកើត និងរបបដែលពាក់ព័ន្ធជាមួយពួកគេ ត្រូវបានបង្កើតឡើង ហើយកំពុងបំពានច្បាប់អន្តរជាតិ។

តុលាការបាននិយាយថា កាតព្វកិច្ចរបស់អ៊ីស្រាអែល រួមមានការបង់ប្រាក់សំណងសម្រាប់ការខូចខាតនិង ការជម្លៀសអ្នកតាំងលំនៅទាំងអស់។ 

ក្នុងប្រតិកម្មភ្លាមៗ ក្រសួងការបរទេសអ៊ីស្រាអែល បានច្រានចោលការរកឃើញបែបនេះថា «មានមូលដ្ឋានមិនត្រឹមត្រូវ» ហើយនិយាយតែម្ខាង និងបាននិយាយឡើងវិញនូវជំហររបស់ខ្លួនថា ដំណោះស្រាយនយោបាយក្នុងតំបន់ អាចឈានទៅដល់បាន តាមរយៈតែការចរចាប៉ុណ្ណោះ។

ការិយាល័យរបស់នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយនៅក្នុងសេចក្តីថ្លែងការណ៍ថា ប្រទេសជ្វីហ្វ មិនអាចជាអ្នកកាន់កាប់នៅក្នុងទឹកដីរបស់ខ្លួនបានទេ។

ការលើកឡើងបែបនេះ បានធ្វើឲ្យមានកំហឹងដល់អ្នកតាំងលំនៅ នៅតំបន់ West Bank ព្រមទាំងអ្នកនយោបាយ ដូចជារដ្ឋមន្ត្រីហិរញ្ញវត្ថុ លោក Bezalel Smotrich ដែលគណបក្សសាសនាជាតិនិយមរបស់លោក ជិតស្និទ្ធទៅនឹងចលនាអ្នកតាំងលំនៅ ហើយខ្លួនលោកផ្ទាល់ ក៏រស់នៅក្នុងតំបន់ West Bank ។