សិស្សានុសិស្សវិទ្យាល័យចំនួន ២នាក់ មកពីសាលារៀនសុវណ្ណភូមិ ទីតាំងប៉ោយបែតទី២ បាន​ទទួល​ជ័យលាភី The Most Motivated Student Award ពីកម្មវិធី SIMOC និង​តំណាង​ប្រទេស​កម្ពុជា ចូលរួម​ប្រកួត​វគ្គផ្តាច់ព្រ័ត្រ​ជាមួយ​ក្រុម​សិស្សានុសិស្ស​មក​ពីប្រទេសនានា​ទូទាំង​ពិភព​លោក​ នៅក្នុងកម្មវិធីគណិតវិទ្យាអូឡាំព្យាដអន្តរជាតិ ចាប់ពីថ្ងៃទី២០ ដល់២៤ ខែកក្កដា ឆ្នាំ​២០២៤ នៅប្រទេសសិង្ហបុរី។

ការប្រកួតគណិតវិទ្យាអូឡាំព្យាអន្តរជាតិនេះ ត្រូវបានរៀបចំឡើងដោយក្រសួងអប់រំ នៃប្រទេស​សិង្ហបុរី សហការជាមួយលេខាធិការដ្ឋាន SIMOC ដោយមានបេក្ខជនចូលរួមសរុបចំនួនជិត ២,០០០​នាក់ មកពីប្រទេសចំនួន៣២ ទូទាំងពិភពលោក។ ការប្រកួតនេះ ត្រូវបានបែង​ចែក​ជា​ការ​ប្រកួត​ជាឯកជន និងការប្រកួតជាក្រុម ហើយសិស្សានុសិស្សដែលមានទេពកោសល្យកំពូល នឹង​ទទួលបានមេដាយ និងពានជាលក្ខណៈបុគ្គល និងក្រុម។

យុវជន លី ឆេងហ៊ួរ ថ្នាក់ទី១១ មកពីសាលារៀនសុវណ្ណភូមិ ទីតាំងប៉ោយបែតទី២ ខេត្ត​បន្ទាយ​មាន​ជ័យ ដែលត្រូវបានជ្រើសរើសឲ្យទៅចូលរួមប្រកួតនៅប្រទេសសិង្ហបុរី បានប្តេជ្ញា និងក្តី​សង្ឃឹម​ថា នឹងនាំយកស្នាដៃកូនខ្មែរជាច្រើនរូបដើម្បីទៅតំណាងប្រទេសកម្ពុជា ព្រមទាំងក្រេប​យក​ចំណេះ​ដឹងថ្មីៗ ក៏ដូចជាបទពិសោធន៍ឲ្យបានច្រើន ដើម្បីជាប្រយោជន៍ខ្លួនឯង និង​ដើម្បី​ប្អូនៗ​ជំនាន់​ក្រោយ ដើម្បីអាចឡើងបង្ហាញសមត្ថភាពលើឆាកអន្តរជាតិដូចគ្នាផងដែរ។

សូមបញ្ជាក់ជូនថា ជារៀងរាល់ឆ្នាំ សិស្សានុសិស្សសាលារៀនសុវណ្ណភូមិជាច្រើនរូប តែងតែ​ត្រូវ​បាន​ជ្រើស​រើសតំណាងប្រទេសកម្ពុជា ទៅចូលរួមការប្រកួតនានា ព្រមទាំងផ្លាស់ប្តូរចំណេះដឹង និង​បទ​ពិសោធន៍នៅក្រៅប្រទេស ហើយទទួល​បានជោគជ័យ​គួរ​ឱ្យមោទកភាព​ជូន​ដល់​ជាតិ​មាតុភូមិ និងលើកមុខមាត់ប្រទេសកម្ពុជានៅលើឆាកអន្តរជាតិ៕