ក្រសួងការបរទេសរបស់ប្រទេសឥណ្ឌា កាលពីថ្ងៃសុក្រ បាននិយាយថា ប្រជាជនរបស់ខ្លួនទាំងអស់មានសុវត្ថិភាព នៅក្នុងប្រទេសបង់ក្លាដែស ដែលរងការវាយប្រហារដោយអំពើហិង្សា ជាកន្លែងដែលមនុស្សរាប់សិបនាក់ បានស្លាប់នៅក្នុងការតវ៉ា ជុំវិញប្រព័ន្ធកូតាសម្រាប់ការងាររដ្ឋាភិបាល។

អ្នកនាំពាក្យក្រសួងការបរទេស លោករ៉ានឌី ចៃស្វល(Randhir Jaiswal) បាននិយាយថា ប្រជាជនឥណ្ឌាប្រហែល ៨.៥០០នាក់ កំពុងសិក្សានៅប្រទេសបង់ក្លាដែស ពួកគេភាគច្រើនបន្តក្នុងអាជីពផ្នែកវេជ្ជសាស្ត្រ ហើយមានប្រជាជនឥណ្ឌាប្រហែល ១៥.០០០ នាក់ រស់នៅក្នុងប្រទេសនេះ។

លោក Jaiswal បាននិយាយទៅកាន់អ្នកសារព័ត៌មានថា យើងកំពុងរក្សាទំនាក់ទំនងជាប់ជានិច្ចជាមួយពួកគេ ដើម្បីផ្តល់ជំនួយណាមួយដែលពួកគេត្រូវការ។ នៅក្នុងការណែនាំមួយ ប្រទេសឥណ្ឌាបានជំរុញឱ្យពលរដ្ឋរបស់ខ្លួននៅក្នុងប្រទេសបង់ក្លាដែស កាត់បន្ថយការធ្វើដំណើរនៅខាងក្រៅលំនៅឋានរបស់ពួកគេ។

អង្គការនិស្សិត នៅក្នុងទីក្រុង New Delhi និង Kolkata បានចេញធ្វើបាតុកម្មសាមគ្គីភាព ដើម្បីគាំទ្របាតុករបង់ក្លាដែស។ បាតុករមួយចំនួន ត្រូវបានឃុំខ្លួននៅពេលធ្វើដំណើរទៅកាន់គណៈកម្មាធិការជាន់ខ្ពស់ប្រទេសបង់ក្លាដែស ក្នុងទីក្រុង Kolkata ហើយក្រោយមកត្រូវបានដោះលែងវិញ។

ភាពច្របូកច្របល់នៅទូទាំងប្រទេសបង់ក្លាដែស ជាការរំជើបរំជួលធំបំផុត ចាប់តាំងពីនាយករដ្ឋមន្ត្រី លោកស្រី Sheikh Hasina បានជាប់ឆ្នោតជាថ្មី នៅឆ្នាំនេះ ដែលភាពច្របូកច្រល់នេះ ត្រូវបានជំរុញដោយភាពអត់ការងារធ្វើខ្ពស់ ក្នុងចំណោមយុវជនដែលមានចំនួនជិតមួយភាគប្រាំ នៃចំនួនប្រជាជន ១៧០ លាននាក់ របស់ប្រទេស។