កំពង់ឆ្នាំង៖ «ក្រុមការងារចុះមូលដ្ឋានដើរតួនាទីយ៉ាងសំខាន់ក្នុងការជួយគាំទ្រ ទាំងបច្ចេកទេស និង​ធនធានដល់រដ្ឋបាលថ្នាក់ក្រោមជាតិ លើការអនុវត្ត​គោល​នយោបាយ​ជាយុទ្ធសាស្ត្រ​បញ្ច​កោណ ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព ដែល​មាន​ការ​កែ​ទម្រង់ និងការពង្រឹងអភិបាលកិច្ចជាស្នូល»។ លោកឧកញ៉ាមហាមន្ត្រី គុយ សុផល ប្រធាន​ក្រុម​ការងារ​ចុះមូលដ្ឋានស្រុកបរិបូណ៌ ខេត្តកំពង់ឆ្នាំង មានប្រសាសន៍បែបនេះ ក្នុងពិធីប្រកាស​សមាសភាពក្រុមការងារចុះមូលដ្ឋានស្រុកបរិបូណ៌ ខេត្តកំពង់ឆ្នាំង នៅព្រឹកថ្ងៃទី២០ ខែកក្កដា ឆ្នាំ២០២៤ ។

លោក​ឧកញ៉ាមហាមន្ត្រី គុយ សុផល បានប្រកាស​សមាសភាព​ក្រុមការងារ​ចុះមូលដ្ឋាន​ស្រុក​បរិបូណ៌ ដែលមានសមាជិកចុះជួយថ្នាក់ស្រុក និងឃុំ និងបានពន្យល់អំពីតួនាទីភារកិច្ច របស់​ក្រុម​ការងារ​ចុះ​មូលដ្ឋានទាំងកម្រិតថ្នាក់ជាតិនិងក្រោមជាតិ របៀបរបបការងារ ព្រមទាំង​យន្ត​ការ​ការងារ ដើម្បីឱ្យការអនុវត្តការងារ ទទួលបានប្រសិទ្ធភាព និងប្រសិទ្ធផលពិតប្រាកដ ។ ក្រុម​ការងារ​ចុះមូលដ្ឋានត្រូវសហការគ្នា ធ្វើជាមួយគ្នាឲ្យបានល្អ មានឆន្ទៈ មានការទទួលខុសត្រូវខ្ពស់ មានភាពម្ចាស់ការ ដែលចាំបាច់នោះត្រូវចុះដល់មូលដ្ឋានតាមផ្ទះប្រជាពលរដ្ឋ ដើម្បីស្តាប់​ពី​តម្រូវ​ការ បញ្ហាប្រឈមពិតប្រាកដរបស់ប្រជាពលរដ្ឋ ដើម្បីរួមគ្នាគិត រួមគ្នាដោះស្រាយជូនប្រជាពលរដ្ឋ ឲ្យមានប្រសិទ្ធភាពបំផុត ស្របតាមគោលនយោបាយអាទិភាពរបស់រាជរដ្ឋាភិបាល។

លោក​​ឧកញ៉ាម​ហាមន្ត្រីក៏បានពាំនាំការសួរសុខទុក្ខពីសម្តេចតេជោ ហ៊ុន សែន ប្រធាន​គណបក្ស​ប្រជាជន និងសម្តេចធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និង​កិច្ច​ខិតខំ​ប្រឹង​ប្រែង​របស់​រាជរដ្ឋាភិបាល ក្នុងការអនុវត្តនូវគោលនយោបាយបក្សដែលបានដាក់ចេញ និង​យុទ្ធសាស្ត្រ​បញ្ចកោណដំណាក់កាលទី១ ព្រមទាំងការបង្កើតក្រុមការងារចុះមូលដ្ឋាន ដើម្បីបម្រើ​ផល​ប្រយោជន៍​ប្រជាពលរដ្ឋ និងចូលរួមលើកកម្ពស់សេដ្ឋកិច្ចជាតិ។ ការអនុវ​ត្ត​គោល​នយោបាយ​ជា​យុទ្ធសាស្ត្របញ្ចកោណ ដំណាក់កាលទី១បានកំណត់អាទិភាពជាគន្លឹះចំនួន៥គឺ៖ «មនុស្ស ផ្លូវ ទឹក ភ្លើង និងបច្ចេកវិទ្យា» សំដៅការពារ ថែរក្សា ពូនជ្រំសមិទ្ធផលជាតិជំរុញ​សន្ទុះ​កំណើន​សេដ្ឋកិច្ច ធ្វើឲ្យប្រទេសកម្ពុជាប្រែក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និង​កសាងមូលដ្ឋានឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ប្រែក្លាយ​ជា​ប្រទេស​មាន​ចំណូល​ខ្ពស់ ៕ កាំង ហុងវាស្នា