ដើម្បីចូលរួមចំណែក ជាមួយកាកបាទក្រហមកម្ពុជា ក្នុងការបម្រើសេវាកម្មមនុស្សធម៌ ជូន​ជន​រង​គ្រោះ និងជនងាយរងគ្រោះ មន្រ្តីសង្ឃសាលាគណគណៈធម្មយុត្តិកនិកាយខេត្តប៉ៃលិន ដឹកនាំ​ដោយ​ព្រះគ្រូសន្តិមហារតន៍មុនី សាន់ លី ព្រះមេគណគណៈធម្មយុត្តិកនិកាយខេត្តប៉ៃលិន ព្រមទាំង​ព្រះ​គ្រូចៅធិការវត្ត នៃគណៈធម្មយុត្តិកនិកាយក្នុងខេត្ត បាននាំយកនូវ អង្ករចំនួន​មួយ​តោន ផ្តល់ជូនសាខាកាកបាទក្រហមកម្ពុជា ខេត្តប៉ៃលិន នាឱកាសខួបទី១៦១ ទិវាពិភព​លោក​កាក​បាទ​ក្រហម និងអឌ្ឍចន្ទក្រហម ៨ ឧសភា ឆ្នាំ២០២៤ ក្រោមប្រធានបទ៖ «រួមគ្នាជា​មួយ​កាក​បាទ​ក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ» ។

អនុប្រធានគណៈកម្មាធិការសាខាកាកបាទក្រហមកម្ពុជា ខេត្តប៉ៃលិន លោកស្រី ពៅ សុខ តំណាង​លោកស្រី បាន ស្រីមុំ ប្រធានគណៈកម្មាធិការសាខាកាកបាទក្រហមកម្ពុជាខេត្តប៉ៃលិន បាន​ចាត់ទុកថា សកម្មភាពដ៏ថ្លៃថ្លានេះ បង្ហាញឱ្យឃើញនូវវប្បធម៌ នៃការចែករំលែក មួយយ៉ាង​សំខាន់ និងការចូលរួមចំណែក ក្នុងវិស័យមនុស្សធម៌ យ៉ាងល្អប្រសើរ រវាងពុទ្ធចក្រ និង​អាណាចក្រ ក្នុងការជួយដល់ប្រជាពលរដ្ឋរងគ្រោះ និងងាយរងគ្រោះ បានទាន់ពេលវេលា ដោយ​មិន​ទុកនរណាម្នាក់ចោល ដោយមិនមានការរាយការណ៍ មកកាន់អាជ្ញាធរគ្រប់ជាន់ថ្នាក់ និង​ក្រុម​ការងារ​របស់សាខានោះឡើយ ។ លោកស្រី ពៅ សុខ បានសម្តែងនូវអំណរព្រះគុណ និងអរគុណ ចំពោះទឹកព្រះទ័យ និងទឹកចិត្តជ្រះថ្លា របស់ព្រះមន្រ្តីសង្ឃ គណៈកម្មការវត្ត និងពុទ្ធបរិស័ទ ដែល​ជា​សប្បុរជន ក្នុងជួយដល់សាខាកាកបាទក្រហមកម្ពុជាខេត្ត សម្រាប់បន្តចែកជូន ដល់​ប្រជាពលរដ្ឋ​រងគ្រោះ និងងាយរងគ្រោះបំផុត ។

លោកស្រី ពៅ សុខ ក៏បានអំពាវនាវបន្ថែម ដល់សប្បុរសជនគ្រប់មជ្ឈដ្ឋាន ដែលមានសទ្ធាជ្រះថ្លា ចូលរួមបរិច្ចាគធនធានផ្ទាល់ខ្លួន ជូនសាខាកាកបាទក្រហមកម្ពុជា ខេត្តប៉ៃលិន ដើម្បីសាខាខេត្ត មានលទ្ធភាព និងធនធាន សម្រាប់បម្រើសេវាកម្មមនុស្សធម៌ ដោះស្រាយបញ្ហាប្រឈមនានា បន្តពង្រឹងភាពធន់សហគមន៍ និងជួយសម្រាលទុក្ខលំបាក របស់ប្រជាពលរដ្ឋរងគ្រោះ និងងាយរងគ្រោះបំផុត តាមគោលការណ៍គ្រឹះរបស់កាកបាទក្រហមកម្ពុជា ដោយមិនប្រកាន់និន្នាការនយោបាយ ពណ៌សម្បុរ ជាតិ សាសន៍ មានន័យថា ឱ្យតែមានជនរងគ្រោះ និងជនងាយរងគ្រោះ កាកបាទក្រហមកម្ពុជា ត្រូវតែជួយគាត់ដោយស្មើភាពគ្នាផងដែរ ។

ព្រះគ្រូសន្តិមហារតន៍មុនី សាន់ លី ព្រះមេគណគណៈធម្មយុត្តិកនិកាយខេត្តប៉ៃលិន មានថេរដិកា ថ្លែងអំណរគុណ ចំពោះសាខាកាកបាទក្រហមកម្ពុជាខេត្តប៉ៃលិន ដែលបានអនុញ្ញាតឱ្យព្រះសង្ឃគណៈធម្មយុត្តិកនិកាយខេត្ត បានចូលរួមចំណែក ធ្វើសង្គហទានរួមគ្នា ជាមួយសាខាកាកបាទក្រហមកម្ពុជាខេត្ត ដែលជាស្ថាប័នមនុស្សធម៌ធំជាងគេបំផុតនៅក្នុងខេត្តប៉ៃលិន ដើម្បីជួយសម្រាលនូវការលំបាក ដល់ប្រជាពលរដ្ឋ ដែលត្រូវការឱ្យយើងជួយជាចាំបាច់ផងដែរ ។

សូមបញ្ជាក់ថា កាកបាទក្រហមកម្ពុជាខេត្តប៉ៃលិន សូមអំពាវនាវ ឯកឧត្តម លោកជំទាវ អ្នកឧកញ៉ា លោកឧកញ៉ា លោក លោកស្រី អ្នកនាងកញ្ញា សប្បុរសជន មកពីគ្រប់មជ្ឈដ្ឋាន​ទាំង​ក្នុង​វិស័យ​រដ្ឋ និងវិស័យឯកជន មេត្តាអញ្ជើញ​មកចូលរួម​ឧបត្ថ​ម្ភ​គាំទ្រ​ដោយ​សទ្ធា​ជ្រះថ្លា ដល់​សាខា​កាក​បាទ​ក្រហមកម្ពុជា ខេត្តប៉ៃលិន នៅទីស្នាក់សាខាកាកបាទក្រហមកម្ពុជាខេត្តប៉ៃលិន ដើម្បី​សាខាបន្តសកម្មភាព​មនុស្សធម៌ ជួយដល់ជនរងគ្រោះងាយរងគ្រោះ សូមសប្បុរសជនទំនាក់ទំនងតាមលេខទូរស័ព្វខាងក្រោមនេះ៖

១. ឯកឧត្តម សៅ សារ៉ាត់ (លេខទូរស័ព្ទ 097 78 21 268)

២. លោកជំទាវ ពៅ សុខ (លេខទូរស័ព្ទ 088 41 40 656)

៣. ឯកឧត្តម ហុក សុផល (លេខទូរស័ព្ទ 097 73 33 143) ៕