យោងតាមទិន្នន័យដែលទទួលបានបានឲ្យដឹងថា វិស័យកសិកម្ម ក្នុងរយៈពេល ៦ខែ ឆ្នាំ២០២៤ ពោលគឺក្នុងឆមាសទី១ ការនាំ​ចេញ​កសិ​ផល​​របស់​កម្ពុជា សម្រេចបានជាង ៦លានតោន កើន​ឡើង​ជិត ៦០ភាគរយ ធៀបនឹង​ឆមា​ស​ទី១ ក្នុង​ឆ្នាំ២០២៣ ដែលជាកំណើនមិនធ្លាប់មាន ក្នុង​រយៈ​ពេល ៥ឆ្នាំចុងក្រោយ ។ កសិផល​ប្រមាណ ៦លានតោន បាននាំចេញទៅកាន់ទីផ្សារ គោល​ដៅ​ចំនួន ៧៧ប្រទេស​ទូទាំង​ពិភពលោក​។

៩៤% នៃកសិផលកម្ពុជា គឺឆ្ពោះទៅកាន់ទីផ្សារសំខាន់ៗដូចជា ប្រទេសចិន រួមមាន ចេក អង្ករ ដំឡូងមី ស្វាយ និងមៀន, ប្រទេសរៀតណាម រួមមាន ស្រូវ ចន្ទី ដំឡូងមី ស្វាយស្រស់ និង​ប្រទេស​ថៃ រួមមាន​ ដំឡូងមី ស្វាយស្រស់ ម្ទេស កន្ទក់ ។

សូមជម្រាបជូនដែរថា កសិផលកម្ពុជា ដែលកំពុងមានកំណើនទីផ្សារក្រៅពីស្រូវ ស្វាយចន្ទី និងដំឡូងមី គឺមានដូចជា​ ស្វាយស្រស់ ដំណាប់ស្វាយ ទុរេន គ្រាប់ពោត មៀនស្រស់ ម្រេច និងម្ទេសស្រស់។

ចំពោះគ្រាប់ស្វាយចន្ទីឆៅ ការនាំចេញមានទំហំជាង ៨០០លានដុល្លារ ប្រហែល ១ភាគ៣ នៃ​តម្លៃ​នាំចេញកសិផលសរុបរបស់កម្ពុជា ។

សូមបញ្ជាក់ផងដែរថា ចំពោះទំហំទឹកប្រាក់ពីការនាំចេញកសិផលនានារួមមាន៖ ​១. កសិផល​ស្រូវ៖ ជាង ៤០០លានដុល្លារ, ២.កសិផលអង្ករ ជាង ២០០លានដុល្លារ, ៣.កសិផល​ក្រៅ​ពី​ស្រូវ-អង្ករ ជាង ១៨០០ពាន់លានដុល្លារ និងប្រភេទដំឡូងមីមានបរិមាណជាង ២,៥០លានតោន ដែល​ជា​កំណើនខ្ពស់ជាងគេទី១ ក្នុងចំណោមកសិផលសំខាន់ដទៃទៀត ដោយ​ទទួល​បាន​ទឹក​ប្រាក់​ចំនួន​ជាង ៤៥០លានដុល្លារអាមេរិក៕