កម្មវិធីកសាងអង្គការមហាជន នៃសហភាពសហព័ន្ធយុវជនកម្ពុជា (ស.ស.យ.ក) រាជធានីភ្នំពេញ សហការជាមួយមន្ទីរអប់រំយុវជន និងកីឡា រាជធានីភ្នំពេញ នៅព្រឹកថ្ងៃទី២០ ខែកក្កដានេះ បានរៀបចំកម្មវិធីប្រកួតប្រជែងទិន្នផលបន្លែបង្ការ និងស្នាដៃធ្វើម្ហូប ស្ថិតនៅវិទ្យាល័យជាស៊ីមសាមគ្គី រាជធានីភ្នំពេញ។
គណៈអធិបតីដែលបានអញ្ជើញចូលរួមក្នុងកម្មវិធីនោះមានដូចជា៖ ឯកឧត្តម គង់ ច័ន្ទវាសនា អនុប្រធានសហភាពសហព័ន្ធយុវជនកម្ពុជា រាជធានីភ្នំពេញ តំណាងឯកឧត្តម សាយ សំអាល់ ប្រធានសហភាពសហព័ន្ធយុវជនកម្ពុជារាជធានីភ្នំពេញ លោក គាត រង្សី នាយកកម្មវិធីកសាងអង្គការមហាជន នៃ ស.ស.យ.ក រាជធានីភ្នំពេញ លោក សុខ ពេញវុធ អភិបាលរងរាជធានីភ្នំពេញ និងលោក ហែម ស៊ីណារ៉េត ប្រធានមន្ទីរអប់រំយុវជន និងកីឡា។
នៅក្នុងពិធីនេះ លោក គាត រង្សី នាយកកម្មវិធីកសាងអង្គការមហាជននៃ ស.ស.យ.ក រាជធានីភ្នំពេញ បានឱ្យដឹងថា ដោយមានការគាំទ្រ និងណែនាំពីឯកឧត្តមប្រធានសហភាពសហព័ន្ធយុវជនកម្ពុជា រាជធានីភ្នំពេញ បានឱ្យកម្មវិធីកសាងអង្គការមហាជននៃ ស.ស.យ.ក រាជធានីភ្នំពេញ រៀបចំកម្មវីធីបន្លែបង្ការសប្តាហ៍បៃតង ដោយចាប់ផ្ដើមអនុវត្តការដាំដុះនៅតាមសាលារៀនចំនួន៥រួមមាន៖ ទី១.អនុវិទ្យាល័យ ត្រពាំងសាលា ទី២.អនុវិទ្យាល័យ ហ៊ុន សែន ព្រៃវែង ទី៣.អនុវិទ្យាល័យ ចតុមុខ ទី៤.សាលាបឋមសិក្សា គោកបញ្ជាន់ និងទី៥.វិទ្យាល័យ ជា ស៊ីម ឈូកវ៉ា។ ហើយក្នុងថ្ងៃទី២០ ខែកក្កដានេះ គឺមានការកម្មវិធីប្រកួតប្រជែងទិន្នផលបន្លែបង្ការពីសាលារៀនចំនួន៥នេះ ផ្នែកដាំបន្លែបង្ការ និងវិទ្យាល័យចំនួន៥ផ្សេងទៀតប្រកួតប្រជែងស្នាដៃធ្វើម្ហូប។ លើសពីនេះ លោកបានលើកទឹកចិត្តដល់ប្រជាពលរដ្ឋ និងនៅតាមសាលារៀនចូលរួមដាំបន្លែបង្ការឱ្យបានច្រើនតាមលទ្ធភាពដែលអាចធ្វើបាន។
សិស្សនៅសាលាបឋមសិក្សាគោកបញ្ជាន់ជាប់លេខមួយផ្នែកដាំបន្លែងបង្ការ និងសិស្សនៅវិទ្យាល័យបាក់ទូកជាប់លេខ១ផ្នែកធ្វើម្ហូប បានបង្ហាញអាម្មណ៍រីករាយដែលជោគជ័យក្នុងថ្ងៃនេះ។
គួរបញ្ជាក់ដែរថា កម្មវិធីបន្លែបង្ការ សប្ដាហ៍បៃតង ត្រូវបានបង្កើតឡើងក្នុងគោលបំណងផ្តល់បំណិនជីវិត ដល់សិស្សានុសិស្សក្នុងការដាំដុះ ការចូលចិត្តបរិភោគបន្លែ ការស្រលាញ់បរិស្ថាន និងមានគំនិតសហគ្រិនភាពជាដើម៕ អត្ថបទ៖ ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
