បន្ទាប់ពីមានការដាក់ចេញនូវគោលនយោបាយ «កណ្តាប់ដៃដែក» រយៈពេល ១ខែ ក្នុងគោលបំណងប្រយុទ្ធប្រឆាំងនឹងការជួញដូរគ្រឿងញៀន និងឧក្រិដ្ឋកម្មពាក់ព័ន្ធនឹងក្រុមអន្ធពាល នគរបាលហុងឌូរ៉ាសបានប្រាប់ឲ្យដឹងថា ពួកគេបានរឹបអូសបានកាំភ្លើងរាប់រយដើម និងចាប់ខ្លួនអ្នកដែលត្រូវបានចោទប្រកាន់ថា ជាសមាជិករបស់ក្រុមអន្ធពាល។

ក្រោមវិធីសាស្រ្តគ្មានការយោគយល់នេះ ប្រធានាធិបតីហុងឌូរ៉ាស លោកស្រី Xiomara Castro បានប្រើអំណាចករណីបន្ទាន់ ដើម្បីដាក់ពង្រាយកងកម្លាំងសន្តិសុខនៅក្នុងតំបន់នានា ដែលប្រមូលផ្តុំដោយអំពើឧក្រិដ្ឋកម្ម។ លោកស្រីគ្រោងនឹងបញ្ជូនអ្នកទោសជាង ២០.០០០នាក់ ទៅឃុំនៅក្នុងពន្ធនាគារថ្មី ដែលមានទំហំធំ។

យុទ្ធសាស្ត្រនេះ មានទម្រង់ស្រាលជាងយុទ្ធសាស្ត្ររបស់ប្រទេសជិតខាងអែលសាល់វ៉ាឌ័រ។ នៅទីនោះ ប្រធានាធិបតី លោក Nayib Bukele ក៏បានព្យួរផងដែរនូវសិទ្ធិស្របតាមរដ្ឋធម្មនុញ្ញ អនុវត្តការកាត់ទោសទ្រង់ទ្រាយធំ និងចាប់ឃុំឃាំងប្រមាណជា ២ភាគរយនៃចំនួនប្រជាជនពេញវ័យ និងអនីតិជនរាប់ពាន់នាក់៕