ទីភ្នាក់ងារស៊ើបការណ៍សម្ងាត់តាមអ៊ីនធឺណិតរបស់ប្រទេសអូស្ត្រាលី នៅថ្ងៃសៅរ៍ (ទី២០ ខែកក្កដា) នេះ បានប្រាប់ថា «គេហទំព័រមេរោគ និងកូដមិនផ្លូវការ» កំពុងត្រូវបានបញ្ចេញតាមប្រព័ន្ធអ៊ីនធឺណិត ដោយអះអាងថា ដើម្បីជួយដល់ការមានដំណើរការឡើងវិញ ក្រោយការដាច់ប្រព័ន្ធឌីជីថលជាសកល កាលពីថ្ងៃសុក្រ (ទី១៩ ខែកក្កដា) ដែលបានប៉ះពាល់ដល់ប្រព័ន្ធផ្សព្វផ្សាយ អ្នកលក់រាយ ធនាគារ និងក្រុមហ៊ុនអាកាសចរណ៍។

គួរបញ្ជាក់ថា អូស្ត្រាលី គឺជាប្រទេសមួយ ក្នុងចំណោមប្រទេសជាច្រើនដែលរងផលប៉ះពាល់ ដោយការគាំងប្រព័ន្ធបច្ចេកវិទ្យា ដែលបណ្តាលឲ្យមានការរំខាននៅទូទាំងពិភពលោក បន្ទាប់ពីមានការអាប់ដេត (ការធ្វើបច្ចុប្បន្នភាព) សូហ្វវែរពីក្រុមហ៊ុនបច្ចេកវិទ្យាសន្តិសុខប្រព័ន្ធអ៊ីនធឺណិត CrowdStrike របស់អាមេរិក។

ហើយនៅថ្ងៃសៅរ៍នេះ អគ្គនាយកដ្ឋានតាមដានសញ្ញារបស់ប្រទេសអូស្រ្តាលី (ASD) ដែកជាទីភ្នាក់ងារស៊ើបការណ៍សម្ងាត់តាមប្រព័ន្ធអ៊ីនធឺណិតរបស់ប្រទេសនេះ បានឲ្យដឹងថា៖ «គេហទំព័រមេរោគ និងកូដមិនផ្លូវការមួយចំនួន កំពុងត្រូវបានបញ្ចេញ ដោយអះអាងថា ដើម្បីជួយអង្គភាពដំណើរការឡើងវិញ ក្រោយការគាំងប្រព័ន្ធអ៊ីនធឺណិត ដែលបណ្តាលមកពីកំហុសបច្ចេកទេសរបស់ក្រុមហ៊ុន CrowdStrike»។

នៅលើគេហទំព័ររបស់ខ្លួន ទីភ្នាក់ងារនេះបានប្រាប់ថា មជ្ឈមណ្ឌលសន្តិសុខអ៊ីនធឺណិតរបស់ខ្លួន «សូមជំរុញយ៉ាងខ្លាំងដល់អ្នកប្រើប្រាស់ទាំងអស់ឲ្យតាមដានតែព័ត៌មានបច្ចេកទេស និងការធ្វើបច្ចុប្បន្នភាពរបស់ពួកគេពីប្រភពផ្លូវការរបស់ក្រុមហ៊ុន CrowdStrike ប៉ុណ្ណោះ»៕