ប្រទេសរុស្ស៊ីបានដំឡើងពន្ធនាំចូល ចំពោះទំនិញប្រើប្រាស់នានា ដែលរួមស្រា ស្រាបៀរ ស្ករគ្រាប់ នំប៊ីស្គី (នំតូចដាក់ប្រអប់) និងសាប៊ូកក់សក់ ពោលគឺជាផលិតផលនៅក្នុងប្រទេសដែលគាំទ្រដល់ការដាក់ទណ្ឌកម្មប្រឆាំងនឹងទីក្រុងមូស្គូ។ នេះបើយោងតាមបទបញ្ជារបស់រដ្ឋាភិបាលដែលបានដាក់ចេញ កាលពីល្ងាចថ្ងៃសុក្រ (ទី១៩ ខែកក្កដា)។

ការនាំចូលរបស់រុស្ស៊ីពីប្រទេសដែលដាក់ទណ្ឌកម្មប្រឆាំងនឹងទីក្រុងមូស្គូ ជុំវិញជម្លោះយោធារបស់ខ្លួនជាមួយអ៊ុយក្រែន បានធ្លាក់ចុះក្នុងឆ្នាំ២០២២ ហើយតម្លៃនៃគ្រឿងស្រវឹងនាំចូល បានឡើងខ្ពស់ខ្លាំង។

អ្នកផលិតលោកខាងលិចមួយចំនួន បានបញ្ឈប់ការលក់ទៅឲ្យប្រទេសរុស្ស៊ី ប៉ុន្តែទីក្រុងមូស្គូ បានរកឃើញវិធីចរាចរណ៍ ដើម្បីបន្តរក្សានាំចូលទំនិញ ក្នុងនោះរួមទាំងគម្រោងនាំចូលពីទីផ្សារងងឹត ហើយទំនិញបរទេស ជាច្រើននៅតែមានដាក់លក់តាមហាង។

យោងតាមបទបញ្ជានេះ បានឲ្យដឹងថា ជាឧទាហរណ៍ ពន្ធគយសម្រាប់ទឹកអប់ គ្រឿងសំអាង និងសាប៊ូកក់សក់ពីប្រទេសប៉ូឡូញ នឹងមានចំនួន ៣៥ភាគរយនៃតម្លៃគយ។ កាតព្វកិច្ចបង់ពន្ធ សម្រាប់ផ្ទាំងបិទជញ្ជាំង ដែលនាំចូលពីប្រទេសលីទុយអានី ឡាតវី និងអេស្តូនី នឹងដំឡើងដល់ ៥០ភាគរយ។ ពន្ធនាំចូលស្រា នឹងត្រូវដំឡើងដល់ ២០ភាគរយ។

ការដំឡើងពន្ធថ្មីនេះ នឹងត្រូវបានដាក់ឲ្យដំណើរការ រហូតដល់ថ្ងៃទី៣១ ខែធ្នូ ឆ្នាំ២០២៤ ហើយចូលជាធរមាន ក្នុងរយៈពេល ៧ថ្ងៃ បន្ទាប់ពីមានការប្រកាសជាសាធារណៈ៕