យន្តហោះយោធាមកពីប្រទេសអាឡឺម៉ង់ និងអេស្ប៉ាញ បានចុះចតនៅប្រទេសជប៉ុន កាលពីថ្ងៃសុក្រ (ទី១៩ ខែកក្កដា) ដែលនេះគឺជាការធ្វើដំណើរទៅចូលរួមសមយុទ្ធរួមគ្នាជាមួយសមភាគីជប៉ុនរបស់ពួកគេ។

ប្រព័ន្ធផ្សព្វផ្សាយក្នុងស្រុកបានរាយការណ៍ថា យន្តហោះប្រហែល ១០គ្រឿង ក្នុងនោះរួមទាំងយន្តហោះចម្បាំង និងយន្តហោះដឹកជញ្ជូន បានទៅដល់មូលដ្ឋានទ័ពអាកាស Chitose ក្នុងខេត្តភាគខាងជើងនៃកោះហុកកៃដូ (Hokkaido) របស់ប្រទេសជប៉ុន។

យោងតាមទូរទស្សន៍ជាតិជប៉ុន NHK បានឲ្យដឹងថា នេះគឺជាលើកទី១ហើយ ដែលយន្តហោះរបស់ប្រទេសអេស្ប៉ាញ បានចូលរួមក្នុងសមយុទ្ធ នៅក្នុងប្រទេសជប៉ុន។

ទន្ទឹមនឹងនេះដែរ យន្តហោះរបស់កងទ័ពអាកាសបារាំង បានទៅដល់ទីក្រុង Ibaraki ភាគខាងជើងនៃទីក្រុងតូក្យូ កាលពីថ្ងៃសុក្រនោះដែរ ដើម្បីធ្វើសមយុទ្ធជាមួយកងកម្លាំងស្វ័យការពាររបស់ជប៉ុន៕