ពោធិ៍សាត់ ៖ ក្រុមការងារគណបក្សប្រជាជនកម្ពុជាចុះជួយសង្កាត់ចំរើនផល ក្រុងពោធិ៍សាត់ បានសហការជាមួយអាជ្ញាធរមូលដ្ឋាន និងប្រជាពលរដ្ឋ រួមគ្នាដាំដើមក្ងោកប្រមាណ៧០០ដើម តាមសងខាងផ្លូវអូរកា ដែលជាផ្លូវក្រាលក្រួសក្រហម ចាប់ពីចំនុចសាលាសង្កាត់ចំរើនផល រហូតដល់ព្រំប្រទល់ស្រុកភ្នំក្រវាញ ។

លោក ធីម សុធារ៉ា ប្រធានក្រុមការងារចុះជួយសង្កាត់ចំរើនផល បានលើកឡើងថា ការដាំដើមក្ងោក ក្នុងពេលនេះជាការផ្សារភ្ជាប់ ការរស់នៅជាមួយបរិស្ថាន និងដើម្បីសោភ័ណ្ឌភាព ភូមិ-សង្កាត់យើងស្រស់បំព្រង ហើយថ្ងៃនេះយើងរួមគ្នាដាំដើមឈើ ដូចនេះយើងក៏ត្រូវរួមគ្នាថែរក្សាដើមឈើដែលបានដាំរួចទាំងនោះឱ្យលូតលាស់បានល្អផងដែរ ។ ហើយយុទ្ធនាការដាំដើមឈើតាមមូលដ្ឋាននេះ ជាការផ្តួចផ្តើមរបស់ ឯកឧត្តម កែវ រតនៈ ប្រធានក្រុមការងារគណបក្សប្រជាជនកម្ពុជាចុះជួយមូលដ្ឋានខេត្តពោធិ៍សាត់ ។

គួរឱ្យដឹងដែរថា ការដាំដើមឈើនៅតាមទីប្រជុំជន បានផ្ដល់នូវអត្ថប្រយោជន៍យ៉ាងច្រើនដល់មនុស្ស បរិស្ថាន និងសេដ្ឋកិច្ច មានសារៈសំខាន់ចំពោះសុខភាព និងសុខុមាលភាពរបស់គ្រួសារ សហគមន៍ ហេតុដូចនេះហើយទើប ឯកឧត្ដម កែវ រតនៈ បានផ្តួចផ្តើមឲ្យក្រុមការងារគណបក្សប្រជាជនកម្ពុជាចុះជួយតាមមូលដ្ឋាន ស្រុក-ក្រុងទាំង៧ ក្នុងខេត្តពោធិ៍សាត់ ធ្វើការសហការជាមួយអាជ្ញាធរមូលដ្ឋាន ប្រជាពលរដ្ឋ ចូលរួមគ្នាដាំដើមឈើតាមដងផ្លូវជាតិលេខ៥ ក្នុងភូមិសាស្ត្រខេត្តពោធិ៍សាត់ ដែលមានប្រវែងប្រមាណ១០០គីឡូម៉ែត្រ ចាប់ពីព្រំប្រទល់ខេត្ត កំពង់ឆ្នាំងរហូត ដល់ព្រំប្រទល់ខេត្តបាត់ដំបង ជាពិសេសដាំតាមផ្លូវសំខាន់ៗនៅតាមឃុំ -សង្កាត់ ស្រុក-ក្រុងនីមួយៗ ដោយបច្ចុប្បន្នក្នុងយុទ្ធនាការនេះ មានដើមឈើចម្រុះជាច្រើនពាន់ដើម ត្រូវបានដាំជាបន្តបន្ទាប់នៅទូទាំងខេត្តពោធិ៍សាត់ ៕