ព្រះសីហនុ៖ រដ្ឋបាលខេត្តព្រះសីហនុ និងមន្ទីរកសិកម្មរ រុក្ខាប្រមាញ់ និងនេសាទខេត្តព្រះសីហនុ ព្រមទាំងអង្កភាព ស្ថាប័នពាក់ព័ន្ធ រៀបចំប្រារពពិធីរុក្ខទិវា ដាំកូនឈើចម្រុះ (គគីរ ឈើទាល ក្រញូង នាងនួន និងដើមក្ងោក) សរុបចំនួន ១.៥០០ដើម ស្ថិតនៅភូមិតាអោងធំ ឃុំសាមគ្គី ស្រុកព្រៃនប់ ខេត្តព្រះសីហនុ ថ្ងៃទី២០ ខែកក្កដា ឆ្នាំ២០២៤។ 

នៅក្នុងឱកាស ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ រុក្ខទិវា ៩កក្កដា ២០២៤ ដែលបានបង្កើតឡើងពីព្រះរាជបញ្ញាញាណដ៏ភ្លឺស្វាងបំផុតរបស់ព្រះករុណាព្រះមហាវីរក្សត្រ ព្រះវររាជបិតាជាតិខ្មែរ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត ក្នុងគោលបំណងបណ្ដុះនូវស្មារតីពលរដ្ឋគ្រប់រូបយល់ដឹងពីបរិស្ថាន និងអត្ថប្រយោជន៍ព្រៃឈើ។ ដូចនេះ យើងរួមគ្នាចូលរួមចំណែកការពារ និងថែរក្សាព្រៃឈើដែលជាកាតព្វកិច្ចចាំបាច់របស់ពលរដ្ឋគ្រប់ៗរូប ដើម្បីបង្កឱ្យអាកាសធាតុមានភាពប្រក្រតីជាវិជ្ជមានចំពោះវិស័យកសិកម្ម និងមនុស្សជាតិ ព្រមទាំងអភិវឌ្ឍធនធានព្រៃឈើឱ្យកាន់តែសំបូរឡើងថែមទៀត សម្រាប់ជាធ្វើជាមូលដ្ឋានគ្រឹះ នៃការអភិវឌ្ឍ។ ព្រៃឈើ ជាសម្បត្តិធម្មជាតិដ៏មហាសាល សម្រាប់ជីវិតមនុស្ស និងសត្វរស់នៅលើភពផែនដីរបស់យើង ការបាត់បង់ព្រៃឈើគ្រប់ប្រភេទ អាចបណ្តាលឱ្យមានទឹកជំនន់ ខ្យល់កន្ត្រាក់ រន្ទះនិងការរាំងស្ងួត ដែលបានធ្វើឱ្យទីតម្កល់ទឹកធានាសម្រាប់តម្រូវ ការរបស់មនុស្ស សត្វ ត្រូវរីងស្ងួតឈានទៅរកការបាត់បង់ប្រាក់ចំណូល សត្វព្រៃ ធនធានមច្ឆាជាតិគ្រប់ប្រភេទ ហើយអាចបង្កឱ្យមានភាពរហោស្ថាន និងការធ្លាក់ចុះគុណភាពដីផងដែរ ។

ជាមួយគ្នានោះ លោក នេន ចំរើន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ បានលើកឡើងថា រាជរដ្ឋាភិបាល បាននិងកំពុងយកចិត្តទុកដាក់ខ្ពស់លើ "បរិស្ថានរូបវន្ត និងធម្មជាតិប្រកបដោយសុខដុមភាព ភាពធន់ បរិយាបន្ន និងតុល្យភាពរវាងការអភិវឌ្ឍ និងការអភិរក្សធនធានធម្មជាតិ” ឆ្លើយតបនិងការលើកកម្ពស់ការអភិវឌ្ឍចម្ការដែលមានបរិស្ថានប្រកបដោយចីរភាព កាត់បន្ថយពឹងផ្អែកលើការដកហូតអនុផលព្រៃឈើដោយចីរភាព ការទប់ស្កាត់ការទន្ទ្រានកាន់កាប់ដីព្រៃ និងដីតំបន់ការពារធម្មជាតិធ្វើជាកម្មសិទ្ធិ រួមទាំងការលើកកម្ពស់អភិរក្សតំបន់ការពារធម្មជាតិ ព្រៃឈើ និងសត្វព្រៃ បង្ក្រាបបទល្មើសព្រៃឈើ ការជួញដូរសត្វព្រៃ និងបទល្មើសធនធានធម្មជាតិ។ ការផ្តួចផ្តើមរុក្ខទិវាដាំដើមឈើ ត្រូវបានធ្វើឡើងតាំងពីឆ្នាំ១៩៥២ មកម្ល៉េះ ក្រោមព្រះរាជកិច្ចដឹកនាំដ៏ខ្ពង់ខ្ពស់បំផុត របស់ព្រះករុណា ហើយចលនាដាំដើមឈើនេះ បានព្រះបាទសម្តេចព្រះនរោត្តមសីហនុ ព្រះបរមរតនៈកោដ្ឋ“ ទិវាហត្ថកម្ម ដាំដើមឈើ”។ ថ្ងៃនេះ យើងបានរៀបចំរុក្ខទិវា ដាំកូនឈើរចម្រុះសរុបចំនួន ១.៥០០ដើម ដែលត្រូវបានធ្វើឡើងនៅលើដីទំនេរ និងដីព្រៃរេចរិល ដោយចលនាពលរដ្ឋគ្រប់រូប ដាំដើមឈើនៅគ្រប់ទីកន្លែងស្របតាមចក្ខុវិស័យរបស់ប្រមុខដឹកនាំរាជារដ្ឋាភិបាល ៕