យន្តហោះទាំងឡាយកំពុងហោះឡើងជាបណ្តើរៗឡើងវិញ កាលពីថ្ងៃសៅរ៍ ទី២០ ខែកក្កដា បន្ទាប់ពីក្រុមហ៊ុនអាកាសចរណ៍ ធនាគារ និងប្រព័ន្ធផ្សព្វផ្សាយទូទាំងពិភពលោក បានធ្លាក់ចូលក្នុងភាពចលាចលដោយការគាំងផ្នែកព័ត៌មានវិទ្យា ឬ IT ដ៏ធំបំផុតមួយក្នុងប៉ុន្មានឆ្នាំថ្មីៗនេះ ដែលបណ្តាលមកពីការអាប់ដេតកម្មវិធីកំចាត់មេរោគ។

ក្រុមអ្នកដំណើរបានជាប់គាំងនៅតាមអាកាសយានដ្ឋាននានាកាលពីថ្ងៃសុក្រសប្ដាហ៍នេះ ខណៈជើងហោះហើររាប់សិប ត្រូវបានលុបចោលបន្ទាប់ពីការអាប់ដេតកម្មវិធីដែលប្រតិបត្តិការលើប្រព័ន្ធ Microsoft Windows បានគាំង នៅទូទាំងពិភពលោក។

គិតត្រឹមថ្ងៃសៅរ៍ សប្ដាហ៍នេះ ក្រុមមន្ត្រីបាននិយាយថា ស្ថានការណ៍បានវិលមករកភាពធម្មតាវិញនៅតាមអាកាសយានដ្ឋានទូទាំងប្រទេសអា្លល្លឺម៉ង់ និងប្រទេសបារាំង ខណៈទីក្រុងប៉ារីសបានរៀបចំស្វាគមន៍មនុស្សរាប់លាននាក់សម្រាប់ការប្រកួតកីឡាអូឡាំពិកដែលចាប់ផ្តើមនៅថ្ងៃសុក្រសប្ដាហ៍នេះ។

ក្រុមហ៊ុនអាកាសចរណ៍ និងអាកាសយានដ្ឋានអាមេរិកជាច្រើននៅទូទាំងអាស៊ី បាននិយាយថា ពួកគេបានដំណើរការឡើងវិញ ជាមួយនឹងសេវាកម្មត្រួតពិនិត្យ check-in ក្នុងទីក្រុងហុងកុង កូរ៉េខាងត្បូង និងថៃ ហើយភាគច្រើនត្រឡប់ទៅសភាពធម្មតាវិញក្នុងប្រទេសឥណ្ឌា ឥណ្ឌូនេស៊ី និងនៅអាកាសយានដ្ឋាន ឆាំងហ្គី (Changi) របស់សិង្ហបុរី គិតត្រឹមរសៀលថ្ងៃសៅរ៍៕