សេចក្តីថ្លែងការណ៍របស់អាជ្ញាធរសុខាភិបាលនៅតំបន់ហ្កាហ្សាបាននិយាយកាលពីថ្ងៃសៅរ៍ថា ប្រតិបត្តិការរបស់អ៊ីស្រាអែលនៅហ្កាហ្សាដែលនៅតែបន្ត បាននាំឱ្យចំនួនអ្នកស្លាប់នៅក្នុងដែនដីរងការឡោមព័ទ្ធចាប់តាំងពីថ្ងៃទី៧ ខែតុលា កើនឡើងដល់៣៨.៩១៩នាក់។  

យោងតាមសេចក្តីថ្លែងការណ៍ ក្នុងរយៈពេល ២៤ ម៉ោងកន្លងមក កងទ័ពអ៊ីស្រាអែលបានសម្លាប់មនុស្ស៣៧ នាក់ និងរបួស ៥៤ នាក់នៅហ្កាហ្សា។ អ្នកស្លាប់និងរបួសថ្មីទាំងនេះនាំឱ្យចំនួនអ្នកស្លាប់សរុបចាប់តាំងពីជម្លោះប៉ាឡេស្ទីន និងអ៊ីស្រាអែល បានចាប់ផ្តើម កើនឡើងដល់ ៣៨.៩១៩នាក់    ខណៈអ្នករងរបួសរហូតមកដល់ឥឡូវនេះមានជាង ៨៩.៦០០នាក់ ។   

យោងតាមរបាយការណ៍កងកម្លាំងការពារអ៊ីស្រាអែល (IDF) កាលពីថ្ងៃសៅរ៍  ក្នុងរយៈពេលមួយសប្តាហ៍កន្លងមកនេះ កងទ័ពអ៊ីស្រាអែលបានសម្លាប់ក្រុមសកម្មប្រយុទ្ធប៉ាឡេស្ទីនជាង ១៥០ នាក់នៅក្នុងប្រតិបត្តិការនៅទីក្រុង ហ្កាហ្សា ។ ក្នុងអំឡុងពេលនេះ យោធាអ៊ីស្រាអែលបានបើកការវាយឆ្មក់ជាច្រើនទៅលើអគារ និងបន្ទាយដែលប្រើប្រាស់ដោយក្រុមសកម្មប្រយុទ្ធហាម៉ាស ដោយរឹបអូសយកអាវុធ និងឧបករណ៍ផ្សេងៗ។  

ក្រុមហាម៉ាស ពុំទាន់ឆ្លើយតបទៅនឹងការលើកឡើងនេះនៅឡើយទេ។

កាលពីថ្ងៃសៅរ៍ផងដែរ ការិយាល័យប្រព័ន្ធផ្សព្វផ្សាយនៅតំបន់ហ្កាហ្សាគ្រប់គ្រងដោយក្រុមហាម៉ាសបានចេញសេចក្តីថ្លែងការណ៍មួយដោយប្រកាសថាអ្នកកាសែតម្នាក់ត្រូវបានសម្លាប់ក្នុងអំឡុងពេលប្រតិបត្តិការយោធាអ៊ីស្រាអែល ដែលធ្វើឲ្យចំនួនអ្នកកាសែតដែលត្រូវបានសម្លាប់នៅដែនដីហ្កាហ្សាហក់ឡើងដល់១៦១នាក់៕