កំពង់ស្ពឺ៖សម្ព័ន្ធគ្រូពេទ្យសហភាពសហព័ន្ធយុវជកម្ពុជា (ស.ស.យ.ក) សហការជាមួយអាជ្ញាធរខេត្តកំពង់ស្ពឺ នៅថ្ងៃទី២១ ខែកក្កដា ឆ្នាំ២០២៤នេះ បន្តយុទ្ធនាការ «សុខទុក្ខកូនៗ ជាសុខទុក្ខប៉ាប៉ា ហ៊ុនម៉ានី» ដោយមានគណៈអធិបតីចូលរួមមានដូចជា៖ ឯកឧត្តមបណ្ឌិត ជាម ច័ន្ឌសោភ័ណ្ឌ អភិបាលនៃគណៈអភិបាលខេត្តកំពង់ស្ពឺ និងឯកឧត្តមបណ្ឌិត ហេង សុខគង់ សមាជិកគណ:អចិន្ត្រៃយ៍នៃគណ:កម្មាធិការកណ្តាលស.ស.យ.ក និងជាប្រធានសម្ព័ន្ធគ្រូពេទ្យ ស.ស.យ.ក។ យុទ្ធនាការនេះ បានរៀបចំឡើងនៅ វិទ្យាល័យស្លាបលែង ស្រុកបសេដ្ឋ ខេត្តកំពង់ស្ពឺ ដោយមានអ្នកចូលរួមជាសិស្សានុសិស្ស ប្រជាពលរដ្ឋ និងស្ថានប័នពាក់ព័ន្ធផ្សេងៗ សរុបជាង១ពាន់នាក់។

បើតាមឯកឧត្តមបណ្ឌិត ហេង សុខគង់ សមាជិកគណ:អចិន្ត្រៃយ៍នៃគណ:កម្មាធិការកណ្តាលស.ស.យ.ក និងជាប្រធានសម្ព័ន្ធគ្រូពេទ្យ ស.ស.យ.ក បានប្រាប់BTVឱ្យដឹងថា កម្មវិធីនៅថ្ងៃនេះ ធ្វើឡើងក្រោមពាក្យស្លោក «សុខទុក្ខកូនៗ ជាសុខទុក្ខ ប៉ា ប៉ា ហ៊ុន ម៉ានី» ដែលមានការពិនិត្យ ព្យាបាល អប់រំសុខភាពសាធារណៈ និងផ្តល់អាហាររូបត្ថម្ភដល់លោកគ្រូ អ្នកគ្រូ និងសិស្សនុសិស្ស ដោយផ្តើមចេញពីខេត្តកំពង់ស្ពឺ។ បន្ថែមលើនេះ ក៍មានពិនិត្យ និងព្យាបាលជំងឺជូនដល់ប្រជាពលរដ្ឋនៅក្នុងមូលដ្ឋានផងដែ។ ឯកឧត្តមបន្តថា ការពិនិត្យ និងព្យាបាលជំងឺ នៅថ្ងៃនេះ មានដូចជា៖ជំងឺទូទៅ ជំងឺកុមារ ជំងឺមនុស្សចាស់ ជំងឺសសៃរឈាម និងបេះដូង ជំងឺសន្លាក់ ជំងឺភ្នែក ជំងឺច្រមុះ ត្រចៀក បំពង់ក ជំងឺមាត់ធ្មេញ ជំងឺសើរស្បែក និងកាមរោគជាដើម។

ប្រជាពលរដ្ឋ បានបង្ហាញអារម្មណ៍រីករាយ ដែលសម្ព័ន្ធគ្រូពេទ្យ ស.ស.យ.ក បានចុះមកពិនិត្យជំងឺ និងព្យាបាលជំងឺនៅមូលដ្ឋានដោយគិតថ្លៃ។ ការព្យាបាលនេះ បានចូលរួមចំណែកកាត់បន្ថយការចំណាយបានមួយកំរិត។

សម្ព័ន្ធគ្រូពេទ្យ ស.ស.យ.ក ត្រូវបានបង្កើតឡើងនៅថ្ងៃទី២ ខែធ្នូ ឆ្នាំ២០១៤ ក្រោមគំនិតផ្តួចផ្តើមដ៏ខ្ពង់ខ្ពស់របស់ឯកឧត្តម ហ៊ុន ម៉ានី ប្រធាន ស.ស.យ.ក និងលោកជំទាវ យឹម ឆៃលីន ហ៊ុន ម៉ានី ប្រធានកិត្តិយសសម្ព័ន្ធគ្រូពេទ្យ ស.ស.យ.ក ដែលជានិច្ចជាកាលលោកទាំងពីរតែងតែបានបញ្ចូនសម្ព័ន្ធគ្រូពេទ្យ ស.ស.យ.ក ចុះពិនិត្យ និងព្យាបាលជំងឺដល់ប្រជាពលរដ្ឋដោយឥតគិតថ្លៃ នៅតាមជនបទ ដោយគិតត្រឹមថ្ងៃទី២១ខែកក្កដានេះ ក្រុមគ្រូពេទ្យបានចុះពិនិត្យ និងព្យាបាលជំងឺជូនប្រជាពលរដ្ឋ សរុបជាង៦៨ម៉ឺននាក់។ អត្ថបទ៖ទូច សោភ័ណ