​បាល់ទាត់​៖ ​ក្រុមបាល់ទាត់​ជំរើសជាតិ​អ៊ុយ​រូ​ហ្កា​យ​ បាន​សំរេច​លុបចោល​ការ​កោះហៅ​ខ្សែប្រយុទ្ធ Manchester United, Edinson Cavani សំរាប់​ការប្រកួត​អន្តរជាតិ​នៅ​ខែ​កញ្ញា​ខាងមុខនេះ​។

​​ការសំរេច​បែបនេះ បន្ទាប់ពី​ក្លិប​នៅ English Premier League មួយ​ចំនួន​បាន​សំរេច​ចិត្ត​មិន​ឱ្យ​កីឡាករ​របស់ខ្លួន​ចាកចេញ​ សំរាប់​ការប្រកួត​ឱ្យ​ក្រុម​ជំរើសជាតិ​របស់​ពួកគេ​ ដោយសារ​ហេតុ​ផលប្រទេស​ទាំងនោះ​ស្ថិតក្នុង​បញ្ជី​ក្រហម ​របស់ចក្រភព​អង់គ្លេស​។ ​​រាល់​ប្រទេស​ដែល​ស្ថិតក្នុង​បញ្ជី​ក្រហម​របស់​អង់គ្លេស រាល់​អ្នកដំណើរ​ដែល​ត្រលប់​មកវិញ​ពី​ប្រទេស​ទាំងនោះ​ នឹងត្រូវ​តម្រូវឱ្យធ្វើ​ច​ត្តា​ឡី​ស័ក​រយៈពេល ១០ថ្ងៃ​មានន័យថា​ ពួកគេ​នឹង​អវត្តមាន​ពី​ការប្រកួត​ឱ្យ​ក្លិប​អាជីព​ពីរ រឺ​បី​ប្រកួត​យ៉ាងហោចណាស់​។ ​​អ៊ុយ​រូ​ហ្កា​យ​នឹងត្រូវ​ប្រកួត​ជំ​រុះ World Cup នៅ​តំបន់​អាមេរិក​ឡាទីន​ចំនួន​ ៣​ប្រកួត​រួមមាន​ជួប​ជាមួយប៉េរូ បូ​លី​វៀ និងអេ​ក្វា​ដ័​រ​។

​​ដោយឡែក Spurs ឯណោះ​វិញ​នឹង​អនុញ្ញាតឱ្យ​កីឡាករ​អា​ហ្ស​ង់​ទីន ២រូប​របស់ខ្លួន​ចាកចេញ​រួមមាន Giovani Lo Celso និង Cristian Romero ដែល​មានន័យថា​ អ្នក​ទាំងពីរ​នឹងត្រូវ​អវត្តមាន​ពី​ការប្រកួត​របស់ Spurs ៣ប្រកួត​ពេល​ត្រលប់​មកវិញ​។ ​ជាមួយគ្នា​នោះដែរ Aston Villa ក៏បាន​អនុញ្ញាតឱ្យ​កីឡាករ​អា​ហ្ស​ង់​ទីន​របស់ខ្លួន ២រូប​ចាកចេញ​ផងដែរ​រួមមាន​អ្នកចាំទី Emi Martinez និង Emiliano Buendia៕

​អត្ថបទ​៖​នាង សុភា​វុ​ធ