បណ្ដាមេដឹកនាំបរទេសបានបង្ហាញប្រតិកម្មរបស់ពួកគេជុំវិញការសម្រេចចិត្តរបស់ប្រធានាធិបតីអាមេរិក លោក Joe Biden ដែលកាលពីថ្ងៃអាទិត្យ (២១ កក្កដា) បានបញ្ចប់យុទ្ធនាការស្វះស្វែងអាណត្តិថ្មីនៅក្នុងការបោះឆ្នោតខែវិច្ឆិកា។

នាយករដ្ឋមន្ត្រីកាណាដា លោក ចាស្ទីន ទ្រូដូ (Justin Trudeau) បានលើកឡើងថា «ក្នុងនាមជាប្រធានាធិបតី លោក Biden គឺជាដៃគូរបស់ប្រជាជនកាណាដា និងជាមិត្តពិត ហើយយើងសូមអរគុណចំពោះការប្ដេជ្ញាចិត្តកន្លងមក»។

អធិការបតីអាល្លឺម៉ង់ លោក អូឡា សូស (Olaf Scholz) បានបង្ហោះនៅលើបណ្ដាញសង្គម X ថា «លោក Biden បានសម្រេចបានសមិទ្ធិផលដ៏អស្ចារ្យសម្រាប់អាមេរិក សម្រាប់អឺរ៉ុប និងពិភពលោកទាំងមូល។ ការសម្រេចមិនឈរឈ្មោះម្ដងទៀតនេះសមនឹងបានការទទួលស្គាល់»។

នាយករដ្ឋមន្ត្រីអង់គ្លេស លោក គា ស្តាមើ (Keir Starmer) បាននិយាយនៅក្នុងសេចក្តីថ្លែងការណ៍មួយថា «ខ្ញុំគោរពការសម្រេចចិត្តរបស់លោក Biden ហើយយើងទន្ទឹងរង់ចាំធ្វើការជាមួយគ្នាក្នុងអំឡុងពេលនៅសល់នៃតំណែងប្រធានាធិបតីរបស់លោក»។ អ្នកនាំពាក្យរបស់វិមានគ្រឹមឡាំងរបស់រុស្ស៊ី លោក ឌីមីទ្រី ផេស្កូវ (Dmitry Peskov) បាននិយាយថា «ការបោះឆ្នោតនៅសល់ប៉ុន្មានខែទៀត ហើយនោះគឺជាពេលដ៏យូរដែលអាចមានការផ្លាស់ប្តូរច្រើន។ អាទិភាពសម្រាប់ពួកយើងពេលនេះគឺផ្ដោតលើប្រតិបត្តិការយោធាពិសេស»។

មេដឹកនាំពិភពលោកផ្សេងទៀត រួមទាំងពីប្រទេសអូស្ត្រាលី អ៊ីស្រាអែល អេស្ប៉ាញ អៀរឡង់ ន័រវេស ប៉ូឡូញ និងប្រទេសជាច្រើនទៀតក៏បានថ្លែងអំណរគុណដល់ប្រធានាធិបតីសហរដ្ឋអាមេរិករូបនេះចំពោះភាពជាអ្នកដឹកនាំពិភពលោក មិត្តភាព និងការគាំទ្រឥតងាករេ ហើយពួកគេគោរពការសម្រេចចិត្តដែលលោក Biden បានធ្វើ ដោយផ្អែកលើអ្វីដែលលោកជឿថាជាផលប្រយោជន៍ល្អបំផុតរបស់ប្រជាជនអាមេរិក៕